گستاخانہ خاکے۔پاکستان کا فرانس سے شدید احتجاج

پاکستان نے گستاخانہ خاکوں کے معاملے پر فرانسیسی سفیر کو دفتر خارجہ طلب کرکے شدید احتجاج ریکارڈ کرایا۔

ترجمان دفترخارجہ کے مطابق پاکستان نے فرانسیسی سفیرکے سامنے دو ٹوک موقف رکھا اورفرانسیسی سفیر مارک بریٹی کو احتجاجی مراسلہ بھی دیا گیا۔

ترجمان دفترخارجہ کے مطابق فرانسیسی سفیرکواسپیشل سیکریٹری یورپ نے احتجاجی مراسلہ دیا اور کہا کہ کسی کو مسلمانوں کی توہین کرنے کا کوئی حق نہیں۔

ناموس رسالت ؐ پرکوئی سمجھوتہ نہیں ہوگا۔شاہ محمود قریشی

شاہ محمود قریشی کا کہنا تھا کچھ عرصہ قبل چارلی ہیبڈو نے گستاخانہ خاکے شائع کیے، فرانسیسی اخبار کی ناپاک جسارت پر شدید احتجاج اورمذمت کی ہے، کبھی قرآن پاک کو شہید کرنے کے واقعات سامنے آتے ہیں، وزیراعظم نے اقوام متحدہ جنرل اسمبلی میں اسلامو فوبیا کیخلاف آواز اٹھائی، وزیراعظم نے بانی فیس بک سے اسلام مخالف مواد روکنے کا کہا، او آئی سی کے آئندہ اجلاس میں جامع قرارداد پیش کروں گا، 15 مارچ اسلامو فوبیا کیخلاف عالمی دن کے طور پر طے کرنے کی تجویز دیں گے۔

اس سے قبل وزیراعظم عمران خان نے سوشل میڈیا پر اپنے پیغام میں فرانسیسی صدر میکرون کے اسلام مخالف بیانات کی مذمت کرتے ہوئے کہا لیڈر کی پہچان یہ ہے کہ وہ لوگوں کو متحد کرتا ہے، فرانسیسی صدر کو دنیا کو تقسیم کرنے کے بجائے معاملات کو حل کرنا چاہئے تھا۔ دنیا کو تقسیم کرنے سے انتہا پسندی مزید بڑھے گی۔