گلگت میں دھاندلی ہوئی تو عوام کیساتھ اسلام آباد میں دھرنا دینگے، بلاول

پاکستان پیپلزپارٹی کے چیئرمین بلاول بھٹو زرداری نے اعلان کیا ہے کہ اگر گلگت بلتستان کے انتخابات میں دھاندلی کی کوشش بھی کی گئی تو عوام کے ساتھ اسلام آباد میں دھرنا دیں گے۔
بلاول بھٹو زرداری ان دنوں گلگت بلتستان میں انتخابی مہم کے سلسلے میں اسکردو میں موجود ہیں جہاں وہ انتخابی مہم زور و شور سے چلارہے ہیں۔
اسکردو میں کارنر میٹنگ سے خطاب میں بلاول کا کہنا تھا کہ یہ الیکشن اقتدار کا نہیں، آپ کے مستقبل کا الیکشن ہے اور ہمیں گلگت بلتستان کو اس تباہی سے بچانا ہے جو پورے پاکستان میں تبدیلی کے نام سے شروع ہوئی ہے۔
ان کا کہنا تھا کہ ہم آپ کو یہاں دھاندلی کی اجازت نہیں دیں گے، اگر ووٹ چوری کرنے کی کوشش کی توگلگت کی عوام کے ساتھ اسلام آباد جائیں گے اور دھرنا دیں گے۔
انہوں نے مزید کہا کہ نوجوان قیادت ہی نوجوانوں کے مسائل حل کرسکتی ہے، نوجوانوں کا سب سے بڑا مسئلہ بے روزگاری ہے اور اس کا حل صرف پیپلز پارٹی کے پاس ہے۔