کراچی میں مبینہ پولیس مقابلہ۔5 ملزمان ہلاک

ڈیفنس فیز4 یثرب امام بارگاہ کے قریب مبینہ پولیس مقابلے میں 5 ملزمان مارے گئے۔

نجی ٹی وی کے مطابق کراچی کے علاقے ڈیفنس فیز 4 یثرب امام بارگاہ کے قریب مبینہ پولیس مقابلے میں 5 ملزمان مارے گئے،ہلاک ہونے والوں کی لاشیں جناح اسپتال منتقل کردی گئیں۔

پولیس حکام کے مطابق 5 ملزمان کراچی کے علاقے ڈیفنس فیز 4 کے ایک بنگلے میں ڈکیتی کی نیت سے داخل ہوئے تھے کہ اسی دوران پولیس کو اطلاع ملی اور وہ موقع پر پہنچ گئی۔

ملزمان نے پولیس کو دیکھتے ہی فائرنگ کردی جبکہ پولیس کی جانب سے جوابی فائرنگ میں پانچوں ملزمان ہلاک ہوگئے۔

ایس ایس پی ساؤتھ زبیر نذیر نے بتایا کہ ہلاک ملزمان ڈبل کیبن گاڑی میں آئے تھے، ملزمان کے قبضے سے اسلحہ برآمد ہوا ہے جب کہ ابتدائی طورپرملزمان سرائیکی گینگ کے کارندے معلوم ہوتے ہیں۔

پولیس کا دعویٰ ہے کہ ہلاک ملزمان ڈکیتی کی درجنوں وارداتوں میں ملوث تھے، ہلاک ملزمان میں سے تین کی شناخت مصطفیٰ، محمد عابد اور ریاض کے ناموں سے ہوئی ہے جب کہ دیگر کی شناخت کے لیے کوششیں کی جارہی ہیں۔