آئل ٹینکر کی ہڑتال۔ایندھن کی سپلائی معطل

آل پاکستان آئل ٹینکرز کنٹریکٹرز ایسوسی ایشن نے مطالبات کی منظوری کے لیے ہڑتال کردی جس سے راولپنڈی اسلام آباد سمیت متعدد علاقوں کو پٹرول و ڈیزل کی سپلائی معطل ہوگی۔

آئل ٹینکرزکے اوقات کار میں ردوبدل کے خلاف آئل ٹینکرز کنٹریکٹرز نے ہڑتال کی ہے جس کے نتیجے میں پٹرول پمپس پر پٹرول بحران پیدا ہونے کا خدشہ بڑھ گیا۔

آل پاکستان آئل کنٹریکٹرز ایسوسی ایشن کے جنرل سیکریٹری نعمان بٹ کا کہنا تھا کہ راولپنڈی انتظامیہ نے دن میں آئل ٹینکرز کے داخلے پر پابندی عائد کی ہے جو قابل عمل نہیں، انتظامیہ سے مذاکرات بھی کیے اور سیکریٹری پٹرولیم کو خطوط بھی ارسال کیے لیکن کسی نے مسئلے کے حل کے لیے سنجیدگی نہیں دکھائی، موجودہ اوقات کی پابندی میں آئل ٹینکرز پٹرول ڈیزل سپلائی نہیں کرسکتے، مطالبات کی منظوری تک ہڑتال کریں گے۔

ایسوسی ایشن کے جنرل سیکریٹری نے کہا کہ جڑواں شہروں، آزادکشمیر، گلگت بلتستان، اسلام آباد ایئرپورٹ اور پاور پلانٹس کو بھی پٹرولیم مصنوعات کی سپلائی بند کردی ہے، آئل ٹینکرز مالکان اور کنٹریکٹرز آج روات ٹی چوک پر احتجاجی مظاہرہ بھی کریں گے۔