اسلام آباد میں کچرے کے ڈھیر سے7 دستی بموں سے بھرا ڈبہ برآمد

وفاقی دارالحکومت کے تھانہ بارہ کہو کے علاقہ میں کچرے کے ڈھیر سے سات دستی بم سے بھرا ڈبہ ملا ہے، محکمہ انسداد دہشتگردی نے قبضہ میں لے کرتحقیقات شروع کردیں۔

نجی ٹی وی کے مطابق کچرے کے ڈھیر میں دستی بم کی موجودگی کی اطلاع سیف سٹی کو موصول ہوئی جس پرتھانہ بارہ کہو پولیس اور سی ٹی ڈی ٹیم موقع پر پہنچی۔ قریبی ایریا کی سرچنگ پرزنگ آلود ڈبے سے مزید چھے دستی بم ملے، پولیس ذرائع کے مطابق تمام دستی بم کیچڑ میں پڑے رہنے کے باعث گیلے تھے۔

کچرے کے ڈھیر سے ملحقہ جگہ گزشتہ روز ہموارکی گئی تھی، ابتدائی تحقیقات کے مطابق دستی بم مقامی اسلحہ ساز فیکٹری کے تیارکردہ ہیں جنہیں ناکارہ بنانے کے بعد سی ٹی ڈی عملہ نے اپنے قبضہ میں لے لیا ہے۔دستی بم ملنے پر دھماکہ خیز مواد ایکٹ کی دفعات کے تحت تھانہ بارہ کہو میں ایف آئی آر درج کرلی گئی ہے۔