احتساب عدالت کا شہباز شریف کو کورونا ویکسین لگوانے کا حکم

احتساب عدالت نے اپوزیشن لیڈر قومی اسمبلی شہباز شریف کو کورونا ویکسین لگوانے اور میڈیکل رپورٹس فراہم کرنے کا حکم دے دیا۔

منی لانڈرنگ ریفرنس میں شہباز شریف اور حمزہ شہباز احتساب عدالت میں پیش ہوئے، نیب کے گواہ تنویر حسین کے بیان پر جرح کی گئی۔ شہباز شریف نے عدالت کو بتایا کہ اس سال 70 سال کا ہو جاؤں گا، کورونا ویکسین لگوانا میرا حق ہے۔ عدالت نے ہوم سیکریٹری کو 2 روز میں شہباز شریف کی ویکسین کروانے کی ہدایت کر دی۔

شہباز شریف نے عدالت کو مزید بتایا کہ میرے میڈیکل بورڈ اور میڈیکل رپورٹس آپ کے حکم پر ہوئی مگرایک ماہ پہلے میڈیکل بورڈ آیا تھا، ٹیسٹ وغیرہ ہوئے تھے،آج تک میرے ٹیسٹوں کی رپورٹس مجھے فراہم نہیں کی گئیں۔ احتساب عدالت نے لیگی صدر کو میڈیکل رپورٹس فراہم کرنے کا حکم دیتے ہوئے سماعت کل تک ملتوی کردی۔