سعد رضوی کی گرفتاری کیخلاف دوسرے روز بھی احتجاج جاری۔ اہم شاہرایں بند

 تحریک لبیک پاکستان کے سربراہ سعد رضوی کی گرفتاری کیخلاف کراچی سمیت پنجاب کے مختلف شہروں میں اہم شاہراہیں ٹریفک کے لیے بند ہیں، احتجاج کے باعث متعدد اہم شاہراہیں بند ہیں اور شہریوں کو شدید پریشانی کا سامنا ہے۔ رش میں متعدد گاڑیاں اور ایمبولینسیں بھی پھنسی ہیں۔ کئی مقامات پر مظاہرین اور پولیس میں جھڑپیں بھی ہوئیں جس کے باعث متعدد پولیس اہلکار اور ٹی ایل پی کارکنان بھی زخمی ہوئے۔ پولیس نے 100 سے زائد مظاہرین کو گرفتارکیا ہے۔

کراچی

کراچی میں اورنگی ٹاؤن، حب ریور روڈ، اسٹار گیٹ، بلدیہ ٹاؤن اور کورنگی ڈھائی نمبر میں بھی سڑکیں بند ہیں، کورنگی ڈھائی سے تین نمبر جانے والی سڑک ٹریفک کے لیے بند ہے۔

ٹریفک پولیس کے مطابق  بلاک راستوں کے مقامات سے متبادل راستے فراہم کیے جارہے ہیں اور شہر کے بیشتر مقامات پر ٹریفک معمول کے مطابق ہے جبکہ شارع فیصل اسٹارگیٹ پر دونوں ٹریک پر ٹریفک بحال ہے،  ملیر سے  ائیرپورٹ آنے اور جانے والا روڈ ٹریفک کے لیے کھلا ہے۔

ٹریفک پولیس کا بتانا ہےکہ حسن اسکوائرپل کےنیچے سڑک ٹریفک کے لیے کھول دی گئی اور  یونیورسٹی روڈ پر بھی ٹریفک بحال ہے جب کہ  ٹاورچوک پرسڑک کھول دی گئی ہے۔

لاہور

فیروزوالا میں مظاہرین کی طرف سے رینجرز اور پولیس پر پتھراؤ کیا جس سے ایک پولیس کانسٹیبل جاں بحق ہوگیا۔ ہے جس کی شناخت محمد افضل کے نام سے ہوئی ۔

لاہور میں  شاہدرہ چوک اور ٹھوکرنیازبیگ کو ٹریفک کےلیےکھول دیا گیا ہے جبکہ بھٹہ چوک،شنگھائی فلائی  اوور اور چوہنگ میں مراکہ کے مقام پر سڑک ٹریفک کے لیے بند ہے۔

اس کے علاوہ ٹھوکرنیازبیگ پرراستہ کلیئر ہونےکے باوجودگاڑیوں کی لمبی قطاریں لگی ہوئی ہیں اور ٹریفک انتہائی سست روی کا شکار ہے۔

گزشتہ روز شہر میں بدترین ٹریفک جام کی وجہ سے ٹھوکرنیاز بیگ پرلوگوں نےرات گاڑیوں میں سو کرگزاری۔

اسلام آباد

وفاقی حکومت نے اسلام آباد میں رینجرز تعینات کردی ہے۔ مشتعل افراد نے پولیس گاڑیوں کو آگ لگائی ہے اورعام شہریوں کی گاڑیوں اور موٹرسائیکلز کو بھی نقصان پہنچایا ہے۔

وفاقی دارالحکومت اسلام آباد میں 5 مقامات بند ہیں جن میں ڈھوکڑی چوک، راول ڈیم چوک، بارہ کہو روڈ، راوت کراس اور ترنول شامل ہیں جب کہ اسلام آباد سے اسٹیڈیم روڈ جانے والا راستہ بھی کنٹینر لگاکر بند کیا گیا ہے،اس کے علاوہ راولپنڈی میں اٹھال چوک اور لیاقت باغ میں سڑک ٹریفک کے لیے بند ہے۔

بہاولپور

مذہبی جماعت کےکارکنوں کے احتجاج کے باعث دریائے ستلج پل پر ٹریفک جام ہے ، ڈی جی خان میں مذہبی جماعت کے کارکنوں کا غازی گھاٹ کے مقام پر احتجاج جاری ہے۔

ملتان میں بہاولپور بائی پاس دوسرے روز بھی ٹریفک کے لیے بند ہے جس سے مسافر پریشان ہیں  جب کہ خانیوال میں لاہور موڑپرٹریفک کل دوپہر 3 بجے سے بند ہے جس سے گاڑیوں کی قطاریں لگی ہوئی ہیں اور مسافر شدید پریشان ہیں۔

فیصل آباد

فیصل آباد پولیس کے مطابق ضلع بھر میں مذہبی جماعت کےاحتجاج ختم ہوگئے جس کے بعد تمام سڑکوں پر ٹریفک بحال ہے جب کہ موٹروے اور اطرف کے راستے بھی کھلے ہیں۔

خضدار

خضدار میں کراچی کوئٹہ قومی شاہراہ سنی کے مقام پر ٹریفک کے لیے بند ہے جس سے گاڑیوں کی قطاریں لگ گئیں۔

آزاد کشمیر

ادھر کوٹلی آزاد کشمیر میں  راولپنڈی، میرپوراورلاہور جانے والی مرکزی شاہراہیں بدستوربند ہیں جس سے مسافرپریشان ہیں۔