رمضان المبارک میں بازار سحری سے شام 6 بجے تک کھلے رہیں گے

نیشنل کمانڈ اینڈ آپریشن سینٹر (این سی او سی )نے رمضان میں کورونا ایس او پیز جاری کر دیے۔ رمضان المبارک میں بازار سحری سے شام 6 بجے تک کھلے رہیں گے، افطاری سے رات بارہ بجے تک باہر کھانے کی اجازت مل گئی، رش سے بچنے کے لیے اضافی ٹرینیں چلائی جائیں گی۔ تقریبات پران ڈور اور آئوٹ ڈور ہر طرح کی پابندی برقرار رکھی گئی، سماجی، سیاسی، کھیلوں سمیت ہر قسم کی تقریبات پر پابندی رہے گی۔

اعلامیے کے مطابق لاک ڈائون کے دوران ایمرجنسی کے علاوہ غیر ضروری نقل و حرکت پر پابندی ہوگی۔ رمضان میں رش سے بچنے کے لیے اضافی ٹرینیں چلانے کی ہدایت کی گئیِ، ریلوے کو 70 فیصد مسافروں کے ساتھ چلایا جائے گا۔ بین الصوبائی ٹرانسپورٹ ہفتے میں 2 دن بند رکھنے کا فیصلہ برقرار رکھا گیاجبکہ اندرون شہر ٹرانسپورٹ 50 فیصد مسافروں کے ساتھ چلے گی۔ مزید اقدامات کیلئے اجلاس 20 اپریل کو ہوگا۔

این سی اوسی کے مطابق سینما گھر اور مزار مکمل طور پر بند رہیں گے۔ نجی اور سرکاری دفاتر میں 50 فیصد ورک فرام ہوم پالیسی ہوگی۔ گلگت بلتستان، خیبر پختونخوا، آزاد کشمیر میں سیاحت کے لیے سخت ایس او پیز برقرار رکھے گئے۔ مختلف جگہوں پر ٹیسٹنگ پوائنٹ بنائے جائیں گے۔