جہانگیرترین کو پتہ ہے، وزیراعظم احتساب پر لچک نہیں دکھا سکتے۔گورنر سندھ

اسلام آباد۔گورنر سندھ عمران اسماعیل نے کہا ک ہجہانگیرترین بھی جانتےہیں وزیراعظم احتساب پر لچک نہیں دکھا سکتے ، وزیراعظم پالیسی کسی کیلیے تبدیل نہیں کریں گے ۔

وفاقی وزیر اطلاعات فواد چوہدری کے ہمراہ پریس کانفرنس کرتے ہوئے گورنر سندھ عمران اسماعیل کا کہنا تھا کہ وزیراعظم معیشت پر توجہ دے رہے ہیں، حفیظ شیخ نے معیشت میں اچھا کام کیا ہے، اور اب شوکت ترین مہنگائی کم کرنے پر توجہ دیں گے، ہماری ایکسپورٹ میں اضافہ ہورہا ہے، معاشی حالات میں بہتری آرہی ہے، عمران خان نے زندگی بھر سخت سے سخت فیصلے کیے ہیں، انہیں مہنگائی کی سب سے زیادہ فکر ہے،

گورنر سندھ نے کہا کہ عمران خان انٹرنیشنل لیڈر کے طور پر ابھرے ہیں، آنے والا وقت پاکستان اور قوم کے لیے بہتر ہونے والا ہے، پاکستان کو خوشحالی کی طرف لے جانے پر اپوزیشن گھبرائی ہوئی ہے،  اپوزیشن کے پاس کوئی بات نہیں تو مہنگائی کی بات کرتے ہیں۔

عمران اسماعیل کا کہنا تھاکہ جہانگیر ترین وزیراعظم عمران خان کے قریبی ساتھیوں میں رہے ہیں، عمران خان ان کے ساتھ امتیازی سلوک نہیں کرسکتے، اور جہانگیر ترین بھی پارٹی کا برا نہیں چاہتے،  وزیراعظم کو یقین ہے کہ جہانگیر ترین الزامات کا سامنا کریں گے، تحقیقات مکمل ہونے پر رپوٹ وزیراعظم کو پیش ہوگی۔

گورنرسندھ نے کہا کہ جہانگیر ترین نے پی ٹی آئی کے وکیل علی ظفرپراعتماد کا اظہار کیا ہے اور وہ ان سے مطمئن ہیں، دعا ہے کہ جہانگیر ترین پر لگے الزامات غلط ثابت ہوں، جہانگیرترین بھی جانتےہیں وزیراعظم احتساب پرلچک نہیں دکھا سکتے اور احتساب کا عمل کسی کیلیے تبدیل نہیں کریں گے۔