کوئٹہ میں دہشت گردوں کا حملہ۔ تین سپاہی شہید

کوئٹہ میں دہشت گردوں نے فرنٹیئر کانسٹیبلری کی چوکی پر حملہ کردیا، جس کے نتیجے میں تین سپاہی شہید ہوگئے۔

آئی ایس پی آرکے مطابق کوئٹہ اور تربت میں دہشت گردی کے دو مختلف واقعات میں ایف سی کے تین اہل کار شہید اور 5 زخمی ہوگئے ہیں۔ دہشت گروں نے مارگٹ کے علاقے میں سیکیورٹی ڈیوٹی پر مامور ایف سی کے دستے پر حملہ کردیا۔

فائرنگ کے تبادلے میں تین اہل کارلانس نائیک سید حسین شاہ، سپاہی فیصل محمود اورسپاہی نومان الرحمان شہید اورایک سپاہی زخمی ہوگیا۔ واقعے کے بعد فورسز نے علاقے کو گھیرے میں لے کر مزید کارروائی شروع کردی۔

دہشت گردی کا دوسرا واقعہ تربت کے علاقے شیر بندی میں پیش آیا، جس میں دہشت گردوں نے پاک ایران سرحد پر گشت کرنے والے فرنٹیئر کانسٹیبلری کے جوانوں پر حملہ کیا، جس کے نتیجے میں ایف سی کے چاراہل کار زخمی ہوگئے۔

وفاقی وزیر داخلہ شیخ رشید احمد نے کوئٹہ اور تربت میں ایف سی اہلکاروں پر حملے کی مذمت کرتے ہوئے کہا کہ وطن کی حفاظت پر مامور اہل کاروں پر فائرنگ بدترین دہشت گردی ہے۔

انہوں نے دہشت گردوں کی فائرنگ سے ایف سی اہل کاروں کی شہادت پر دکھ کا اظہارکیا اورکہا کہ دہشت گردوں کی بزدلانہ کارروائیوں سے قانون نافذ کرنے والے اداروں کے حوصلے پست نہیں کیے جاسکتے، بلوچستان کی ترقی اور ملکی سلامتی کا مشن جاری رہے گا۔