این سی او سی نے عیدالفطر کیلیے گائیڈ لائنز کی منظوری دیدی

نیشنل کمانڈ اینڈ کنٹرول سینٹر نے عیدالفطر کیلیے گائیڈ لائنز کی منظوری دیدی ۔

اسد عمر کی زیر صدارت این سی او سی کا اجلاس ہوا جس میں وزیراعظم کے معاون خصوصی صحت ڈاکٹر فیصل سلطان اور دیگر شریک ہوئے، میٹنگ میں عیدالفطر کے لیے گائیڈلائنز کی منظوری دیدی گئی ،جس کے تحت عید کی نماز کورونا ایس او پیزکے ساتھ کھلی جگہوں پر پڑھائی جائے، اگر مسجد کے اندر نماز پڑھانا ضروری ہو تو دروازے اور کھڑکیاں کھلی رکھیں۔

گائیڈ لائنز میں کہا گیا ہے کہ مسجد یا کسی بھی کھلی جگہ پر رش کم کرنے کے لیے نماز دو سے تین بار پڑھائی جائے اور نمازعید کا خطبہ محدود رکھا جائے، بیمار، بزرگ اور15 سال سے کم عمر بچے نماز میں آنے سے گریز کریں، عید کی نماز کے لیے آنے والے ماسک لازمی پہنیں۔

این سی او سی کی گائیڈ لائنز میں مزید کہا گیا ہے کہ مساجد اور عید گاہوں میں داخلے کے لیے متعدد راستے رکھے جائیں، مساجد کے داخلی راستوں پر ہینڈ سینیٹائزر رکھے جائیں اور نمازیوں کے درمیان 6 فٹ کا فاصلہ رکھا جائے، نماز پڑھنے والے اپنی جائے نماز ساتھ لائیں اور وضو گھر سے کرکے آئیں جب کہ گلے ملنے اور ہاتھ ملانے سے گریز کریں،نماز کے بعد ہجوم نا بنائیں۔