کراچی:کچھ دیر چلنے والی آندھی کے باعث حادثات میں5 افراد جاں بحق

کراچی میں طوفانی ہواؤں کے باعث مختلف حادثات میں 2 بچّوں اور ایک خاتون سمیت 5 افراد جاں بحق جبکہ متعدد زخمی ہوگئے۔
کلفٹن تین تلوار کے قریب پلازہ سے گرکر بچہ جاں بحق ہوگیا جبکہ بلدیہ ٹاؤن میں مکان کی چھت گرنے سے ایک خاتون اور ایک مرد جاں بحق ہوگئے۔
بلدیہ سعید آباد میں گھر کی دیوار گرنے سے ایک شخص جان کی بازی ہارگیا۔ شیرشاہ محمدی روڈ کے قریب گھر کی دیوار گرنے سے ایک بچہ زندگی سے ہاتھ دھو بیٹھا۔
اورنگی ٹاؤن نمبر 13 میں مکان کی چھت گرنے سے 2 خواتین زخمی ہوئیں تو ڈینسو ہال کے قریب عمارت کی بالکونی گرگئی جس سے ایک شخص شدید زخمی ہوگیا۔
راشد منہاس روڈ پر ہواؤں کے جھکڑ کے باعث گاڑی اور دو موٹرسائیکلیں ٹکرانے سے 2 افراد زخمی ہوگئے۔راشد منہاس روڈ پر شاپنگ مال پر لگا بل بورڈ کرنے سے2 افراد زخمی ہوگئے۔ مال انتظامیہ کے مطابق بل بورڈ گرنے سے شاپنگ آوٹ لیٹ کے دو ملازمین زخمی ہوئے ،دونوں زخمی ملازمین مال میں موجود ایمبولینس پر نجی اسپتال منتقل کردیے گئے ہیں۔