حکومت کو غلط فہمی ہے،ان کے کیسز لٹک جائیں گے۔چیف جسٹس لاہور ہائیکورٹ

چیف جسٹس لاہور ہائیکورٹ نے کہا ہے کہ حکومت کو غلط فہمی ہے میرے جانے کے بعد ان کے کیسز لٹک جائیں گے۔

چیف جسٹس لاہور ہائیکورٹ محمد قاسم خان نے ریٹائرمنٹ سے قبل اپنے آخری مقدمے کی سماعت مکمل کرلی۔ چیف جسٹس قاسم خان نےآئی جی پنجاب کی تعیناتی کا کیس نئے چیف جسٹس کو بھجوا دیا۔ سرکاری وکیل نے انہیں بتایا کہ ایس پی صدرلاہورحفیظ الرحمن بگٹی کے خلاف سپریم کورٹ نے کارروائی معطل کردی ہے۔

چیف جسٹس قاسم خان نے ریمارکس دیے کہ ہر شاخ پرالو بیٹھا ہے، انجام گلستاں کیا ہوگا۔ انہوں نے کہا کہ اب اس ملک میں جھوٹے انسانوں کو تحفظ ملے گا، جب ملک میں جھوٹے انسان کو تحفظ ملے تو سمجھ لو قانونی کی حکمرانی خطرے میں ہے، حکومت غلط فہمی کا شکار ہے کہ میرے جانے کے بعد ان کے کیسز لٹک جائیں گے، میرے جانے کے بعد نئے چیف جسٹس قانون کے مطابق کارروائی آگے بڑھائیں گے، بونے افراد جب بڑی کرسی پر بیٹھ جائیں تو سسٹم مضبوط نہیں ہوگا۔