اساتذہ کے بھرتی ٹیسٹ کی سی سی ٹی وی ریکارڈنگ ہو گی۔سعید غنی

سندھ کے وزیرِ تعلیم و محنت سعید غنی کا کہنا ہے کہ اساتذہ کی اسامیوں پر ہونے والے ٹیسٹ کی تمام سینٹرز میں مکمل سی سی ٹی وی ریکارڈنگ ہوگی۔

کراچی میں سندھ کے وزیرِ تعلیم و محنت سعید غنی کی زیرِ صدارت محکمہ تعلیم کا اہم اجلاس ہوا جس میں سیکریٹری تعلیم احمد بخش ناریجو اور وی سی سکھرآئی بی اے سید میر محمد شاہ شریک ہوئے۔

اجلاس میں ٹیسٹ کے طریقہ کار، سینٹرز، امیدواروں کی بائیو میٹرک حاضری اور صاف و شفاف فوری نتائج سمیت دیگر امور پر تفصیلی بات چیت کی گئی۔

وزیرِ تعلیم کو اجلاس میں سندھ میں پی ایس ٹی اور جے ایس ٹی کی 46 ہزار 500 سے زائد اسامیوں کے لیے ملی 5 لاکھ درخواستوں اوران کے ٹیسٹ سے متعلق بریفنگ بھی دی گئی۔

بریفنگ میں بتایا گیا کہ کراچی، حیدر آباد، سکھر، شہید بینظیر آباد، میر پور خاص اور لاڑکانہ ڈویژنز میں یہ ٹیسٹ لیئے جائیں گے۔اس موقع پر سندھ کے وزیرِ تعلیم و محنت سعید غنی نے ہدایت کی کہ ممکن بنایا جائے کہ تمام امیدواروں کو مکمل طورپرکھلی فضا میں ٹیسٹ دینے کا موقع میسر آسکے۔

انہوں نے یہ ہدایت بھی کی کہ ٹیسٹ اور نتائج کے شفاف بنانے اور اس کے میرٹ پر نتائج کے لیے تمام اقدامات کیے جائیں، پہلے مرحلے میں پی ایس ٹی اور دوسرے مرحلے میں جے ایس ٹی کے لیے ٹیسٹ ہوں گے۔

وائس چانسلرآئی بی اے سکھر میر محمد شاہ نے بتایا کہ ٹیسٹ اگست کے دوسرے ہفتے میں متوقع ہیں، امیدوار آئی بی اے سکھر کی ویب سائٹ پر اپنی جوابی شیٹ از خود بھی چیک کر سکیں گے۔