وزیراعظم دو روزہ سرکاری دورے پر ازبکستان پہنچ گئے

وزیراعظم عمران خان دو روزہ سرکاری دورے پر ازبکستان پہنچ گئےجہاں ازبکستان کے وزیرِ اعظم عبداللّٰہ اریپو نے وزیرِ اعظم عمران خان کا تاشقند کے ایئر پورٹ پر استقبال کیا۔

وفاقی وزراء شاہ محمود قریشی، فواد چوہدری، شیخ رشید اور علی زیدی کے علاوہ مشیرِ قومی سلامتی ڈاکٹر معید یوسف اور عاطف خان بھی وزیرِاعظم عمران خان کے ہمراہ ہیں۔

ترجمان دفتر خارجہ نے ایک بیان میں بتایا کہ وزیراعظم ازبک صدر شوکت میرزییو کی دعوت پر دورہ کر رہے ہیں۔

وزیراعظم کا اعلی سطح وفد وزیر خارجہ اور کابینہ ارکان پر مشتمل ہو گا۔ پاکستان سے کاروباری برداری کا بڑا گروپ بھی تاشقند جائے گا۔

پاکستان اور ازبکستان کے مابین تجارت، اقتصادی تعاون پر تفصیلی گفتگو ہو گی۔ پاک، ازبک قیادت علاقائی اور عالمی امور پر بھی زیر غور کرے گی۔

دوطرفہ سطح پر متعدد معاہدات اور یادداشتوں پر دستخط کیے جائیں گے۔ وزیراعظم پہلے پاک، ازبک بزنس فورم سے خطاب کریں گے۔

دوطرفہ سطح پر مشترکہ بین الحکومتی کمیشن کا چھٹا اجلاس آج ہو گا۔ پاک، ازبک مشترکہ بزنس کونسل کا پہلا سیشن بھی آج منعقد کیا جائے گا۔ وزیراعظم’’وسطی، جنوبی ایشیائی علاقائی ربط‘ پر کانفرنس میں بھی شرکت کریں گے۔