کراچی کے شہریوں پر گھروں سے نکلنے پر پابندی عائد

وزیر اعلیٰ سندھ کی زیر صدارت صوبائی کورونا ٹاسک فورس کا اجلاس ہوا جس میں کورونا کی خبرناک صورتحال کی نشاندہی کی گئی ، وزیر اعلیٰ سندھ نے کراچی کے شہریوں پر شام 6بجے کے بعد غیر ضروری طور پر گھروں سے نکلنے پر پابندی عائد کرنے کی ہدایت کر دی ۔

وزیراعلیٰ سندھ نے آئی جی اور کمشنر کراچی کو مکمل پابندی لگانے کی ہدایت کی کہا کہ کراچی میں ٹیوشن سینٹر فوری طور پر بند کیے جائیں ، جمعہ کو کراچی میں کورونا کی صورتحال کا دوبارہ جائزہ لوں گا، صورتحال بہتر نہ ہوئی تو مزید اقدامات کریں گے ۔

وزیراعلیٰ سندھ نے ناصر شاہ ، مرتضیٰ وہاب اور اویس شاہ پر مشتمل کمیٹی قائم کر دی ، کمیٹی اسٹیک ہولڈرز سے ملاقات کرکے صورتحال سے آگاہ کرے گی ۔

وزیراعلیٰ سندھ نے کہا کہ ہمارے لوگ زیادہ تر غریب ہیں ، کورونا معاملے میں ان کا خیال کرنا ہے ، وزیراعلی نے سیکریٹری صحت کو تمام نجی ہسپتالوں سے واٹس ایپ گروپ بنانے کی ہدایت کی تاکہ پرائیویٹ سیکٹر کیساتھ کوآرڈینیشن رہے ۔

ترجمان وزیراعلیٰ سندھ کے مطابق کمیٹی سیاسی جماعتوں سے بھی بات کرے گی ۔ وزیراعلیٰ سندھ نے کہا کہ کورونا صورتحال پر کوئی سیاست نہیں ہونی چاہیے ۔