لاہور:ایف آئی اےسائبرکرائم ونگ کی کارروائی،مالکان کوبلیک میل کرنےوالی ماسیوں کاگینگ گرفتار

ایف آئی اےسائبر کرائم ونگ لاہور نے کارروائی  کرتے  ہوئے گھروں میں کام کرنے والی خواتین کے ذریعے بلیک میل کرنے والا گینگ گرفتار کرلیا۔

ایف آئی اے کے مطابق گینگ کی خواتین گھر کے مالک کے ساتھ غیراخلاقی ویڈیوز بناتیں اور پھر انہیں بلیک میل کرتیں اور  پھر یہ ویڈیوز اپنے سرغنہ کو بھجوا دیتیں تھیں۔

ایف آئی اے سائبر کرائم حکام کے مطابق جوہر ٹاؤن کے رہائشی چوہدری سردار احمد نے ایف آئی اے کو درخواست دی تھی، جس میں اپنے خلاف ایک جعلی ویڈیو کے حوالے سے بتایا گیا تھا۔گروہ کا سرغنہ ان ویڈیوز کے ذریعے متعلقہ شخص کو بلیک میل کرتا اور ان سے رقوم اینٹھتا تھا۔

ایف آئی اے سائبر کرائم حکام نے 3 ملزموں نعیم، عامر سہیل اور رؤف کو گرفتار کرلیا، ملزمان 6 سال سے یہ کام کر رہے تھے لیکن کوئی ان کے خلاف کارروائی نہیں کرتا تھا، جبکہ  ملزمان کئی افراد سے لاکھوں روپے بٹور چکے ہیں۔

اس حوالے سے ایف آئی اے حکام کا کہنا ہے کہ ملزمان بعض لوگوں سے پلاٹ کا بھی مطالبہ کرچکے ہیں، ملزمان ایک شخص سے 20 لاکھ روپے لیتے رنگے ہاتھوں پکڑے گئے۔

ایف آئی اے حکام  کا کہنا ہے کہ ملزمان کے قبضے سے متعدد غیر اخلاقی ویڈیوز بھی برآمد کی گئی تھیں، ان کے خلاف مقدمہ درج کرلیا گیا ہے۔