لارڈ نذیر احمد کو5 سال 6 ماہ قید کی سزا

لندن :برطانیہ کی لیبر پارٹی سے تعلق رکھنے والے دارالامرا کےسابق رکن لارڈ نذیر احمد کو دوبچوں کے جنسی استحصال کے جرم میں 5 سال 6 ماہ قید کی سزا سنادی گئی۔

 پاکستانی نژاد برطانوی سابق پارلیمنٹیرین کو 1970 کی دہائی میں ایک 11 سالہ لڑکے پر جنسی حملے اور ایک کمسن لڑکی کے ریپ کی کوشش کا جرم ثابت ہونے پر سزا سنائی گئی۔

لارڈ احمد آف روہدرم کو جنوری 2022 کے آغاز میں ایک لڑکے کے خلاف سنگین جنسی حملے اورایک کمسن لڑکی کے ریپ کی کوشش کرنے کا مجرم پایا گیا۔

عدالت میں کہا گیا کہ نذیر احمد نے 1970 کی دہائی میں لڑکی کے ریپ کی کوشش کی جب وہ 16 یا 17 سال کے تھے جبکہ لڑکی ان کی عمر سے بہت چھوٹی تھی اور اسی عرصے میں انہوں نے 11 سالہ لڑکے سے بدفعلی کی۔

شیفلڈ کراؤن کورٹ کے جج لیوینڈر نے نذیراحمد کو قید کی سزا سناتے ہوئے کہا کہ ان کے فعل سے متاثرین کی شخصیت پرغیرمعمولی اور دیرپا اثرات پڑے ہیں۔