عمران خان کے گھبرانے کا وقت ہو گیا ہے۔ بلاول بھٹو

نصیرآباد:چیئرمین پیپلز پارٹی بلاول بھٹو نے کہا ہے کہ عمران خان کے گھبرانے اور جانے کا وقت ہو گیا ہے ، عوام نے ان پر عدم اعتماد کا اظہار کر دیا ، اب اسمبلی میں بھی ہوگا۔

نصیر آباد میں جلسے سے خطاب کرتے ہوئے بلاول بھٹو کا کہنا تھا کہ پیپلز پارٹی پورے ملک میں ترقیاتی منصوبے شروع کرے گی، آبپاشی کے نظام میں پیپلزپارٹی کےعلاوہ کوئی حکومت بہتری نہیں لا سکی۔ موجودہ حکومت بلوچستان کے حق پر ڈاکہ مارنا چاہتی ہے،عمران خان نے عوام کے ووٹ کے حق پر بھی ڈاکہ مارا، کسی سے بھیک نہیں مانگتے اپنے حق کامطالبہ کرتے ہیں، نہ ملا تو حق چھیننا بھی جانتے ہیں۔ کسی کو اجازت نہیں دیں گے کہ عوام کو حقوق سے محروم رکھے، ہر سازش ناکام بنائیں گے۔

انہوں نے کہا کہ جب سے سلیکٹڈ حکومت آئی غربت اور بیروزگاری میں اضافہ ہوا، کپتان عوام سے روٹی کپڑا اور مکان چھین رہا ہے۔ 1973کا آئین ریاست اورعوام کے درمیان معاہدہ ہے، آئین کے مطابق ہر شہری اور صوبے کا اپنا اپنا حق ہے۔ شہید بی بی نے جمہوریت بہترین انتقام کا نعرہ لگایا، کٹھ پتلی کو پیغام پہنچا چکے، پیپلزپارٹی میدان میں اترچکی ہے، 27 فروری کو کراچی سے اسلام آباد کا رخ کریں گے۔امید ہے بلوچستان کے عوام پیپلزپارٹی کا ساتھ دیں گے۔

بلاول بھٹوزرداری نے کہا ہے کہ سندھ اور بلوچستان کو پانی کی قلت کا سامنا ہے، حکومت ملی تو سب سے پہلے پانی کا مسئلہ حل کریں گے۔

بلاول بھٹو نے کہا کہ آئین کے مطابق ہر شہری اور صوبے کا اپنا اپنا حق ہے،شہید بی بی کا خواب تھا کہ اس علاقے کے عوام ترقی کریں،ا فسوس ہے آج تک یہ خواب پورا نہیں ہو سکا،شہید بےنظیر نصیر آباد کے عوام سے بہت محبت کرتی تھی،شہید بھٹو نے کہا تھا نصیر آباد کے عوام ہمارے پڑوسی ہیں۔