ایک شخص کے کنوئیں میں گرنے سے 5 افراد جان سے ہاتھ دھو بیٹھے

راولپنڈی کے علاقے اڈیالہ میں واقع گاوں ٹھٹہ میں کنوئیں میں گرنے سے 5 افراد جاں بحق ہوگئے۔ ترجمان ریسکیو 1122 کے مطابق ٹھٹہ گائوں میں کنوئیں کی صفائی کے دوران ایک شخص نیچے گرا جس کو بچانے کی کوشش میں دیگر7 افراد بھی کنوئیں میں گرگئے جن میں سے 3افراد زہریلی گیس کی وجہ سے جاں بحق ہو گئے۔

ترجمان کے مطابق ریسکیو ٹیموں کے 10 اہلکاروں نے امدادی کارروائیوں میں حصہ لیا جبکہ آپریشن کے دوران کنوئیں سے 5 افراد کو بے ہوشی کی حالت میں نکالا گیا جس میں سے مزید 2 افراد نے ہسپتال پہنچ کر دم توڑ دیا۔

ریسکیو کا کہنا تھا کہ زندہ بچ جانے والے افراد کو انتہائی تشویشناک حالت میں ہسپتال منتقل کردیا ہے جبکہ تھانہ روات پولیس نے بھی تحقیقات کا آغاز کردیا ہے۔