سینیٹ کی ٹیکنوکریٹ نشست پیپلز پارٹی کی خالدہ سکندر میندھرو کامیاب

کراچی: سندھ میں سینیٹ کی ٹیکنوکریٹ نشست پیپلزپارٹی کی خالدہ سکندر میندھرو نے اپنے نام کرلی۔ ڈاکٹر سکندر میندھرو کے انتقال کے باعث سندھ میں خالی ہونیوالی سینیٹ کی ٹیکنوکریٹ کی نشست پر پولنگ سندھ اسمبلی میں ہوئی، مرحوم سکندر میندھرو کی اہلیہ خالدہ سکندر میندھرو پیپلزپارٹی کی امیدوار تھیں اور مقابلے میں پی ٹی آئی کے نور الحق قریشی تھے البتہ تحریک انصاف کے ارکان نے ووٹنگ کے عمل کا بائیکاٹ کیا جبکہ ایم کیوایم پاکستان اور دیگر جماعتوں نے بھی ووٹنگ میں حصہ نہیں لیا۔ پیپلزپارٹی کی جانب سے 99 میں سے 94 ارکان بشمول وزیراعلیٰ مراد علی شاہ سمیت پی ٹی آئی کے 3 منحرف ارکان اسلم ابڑو، شہریار شر اور کریم بخش گبول نے بھی ووٹ کاسٹ کیا۔ ذاتی مصروفیات کے باعث 5 پی پی ارکان شرمیلا فاروقی،اعجاز بخاری، عذرا پیچوہو، اسماعیل راہو اور علی نواز مہر نے ووٹ کاسٹ نہیں کیا۔