بھارت کے ایک اور طیارے کی کراچی ائیرپورٹ پر ہنگامی لینڈنگ

کراچی:بھارت کی انڈیگو ائیرلائن کے طیارے نے فنی خرابی کے باعث کراچی ایئرپورٹ پرہنگامی لینڈنگ کی ہے۔

ذرائع کے مطابق رواں ماہ بھارت سے آنے اورجانے والے طیاروں کی چوتھی مرتبہ کراچی ائرپورٹ پر لینڈنگ ہوئی ہے، یہ طیارہ شارجہ سے حیدرآباد دکن جا رہا تھا۔

ذرائع کا کہنا ہے کہ بھارتی مسافروں کوکراچی ائرپورٹ کے ٹرانزٹ لاونج منتقل کردیا گیا ہے جنہیں حکام کی جانب سے ناشتہ بھی فراہم کیا گیا جبکہ مسافروں کو سہ پہر 3 بجے تک متبادل طیارے سے حیدرآباد دکن روانہ کیا جائے گا۔

حکام کا کہنا ہے کہ طیارہ فنی خرابی کا شکار ہوا ہے، جس میں 180 مسافر سوار ہیں، طیارے میں تیکنیکی خرابی پیدا ہونے پر بحیرہ عرب سے ہنگامی لینڈنگ کی کال دی گئی۔

بھارتی انڈیگو کے طیارے کے کپتان نے کراچی ایئر ٹریفک کنٹرول سے ہنگامی لینڈنگ کی اجازت مانگی جبکہ رات2:20 پربحفاظت لینڈ کروایا گیا۔