سرجانی  سے 9سالہ مغوی بچہ بازیاب، 3 ملزمان گرفتار

کراچی: پولیس نے سرجانی ٹاؤن سے اغوا کیے گئے 9 سالہ بچے کو بحفاظت بازیاب کروانے کے بعد واردات میں ملوث تین ملزمان کو گرفتار کرلیا ہے۔تفصیلات کے مطابق کراچی پولیس کے اینٹی وائلنٹ کرائم سیل نے تاوان کیلئے اغوا کیے جانے والے 9 سالہ عبداللہ کو پہلوان گوٹھ سے بازیاب کرلیا ہے۔

آپریشن کے دوران پولیس تین اغواکاروں کوگرفتارکرلیا اور تاوان کے لئے رابطے میں استعمال ہونیوالا موبائل فون  بھی قبضے میں لے لیا۔پولیس کے مطابق 9 سالہ عبداللہ کو 13ستمبر کوسرجانی ٹاؤن سے اغوا  کیا گیا تھا، پولیس نے اسی دن نامعلوم ملزمان کے خلاف مقدمہ درج کیا تھا۔ کراچی پولیس کے اینٹی کرائم سیل کے ایس ایس پی امجد حیات کے مطابق اغوا کاروں نے 30 لاکھ روپے کا مطالبہ کیا تھا۔

پولیس کے مطابق وائلنٹ کرائم سیل نے تکینکی اور سائبر وسائل کی مدد سے اغوا  برائے تاوان میں ملوث ملزمان کو  تین دن کے اندر گرفتار کرکے مغوی کو بحفاظت بازیاب کرالیا۔ پولیس ملزمان سے مزید تفتیش کررہی ہے۔