کراچی بورڈ کا میٹرک سائنس کی مارکس شیٹس 5 اکتوبر کو جاری کرنے کا اعلان

کراچی(امت نیوز) ثانوی تعلیمی بورڈ کراچی نے دہم جماعت سائنس گروپ کی مارکس شیٹ 5 اکتوبر بروز بدھ سے جاری کرنے کا اعلان کردیا ہے جبکہ ماہ نومبر کے دوسرے ہفتے تک نہم سائنس گروپ کے سالانہ امتحانی نتائج جاری کرنے کا عندیہ بھی دیا ہے۔
اس ضمن میں ثانوی تعلیمی بورڈ کراچی کے ناظم امتحانات عمران طارق نے بتایا کہ دسویں جماعت سائنس گروپ کی مارکس شیٹ تیار ہوچکی ہیں، 5 اکتوبر 2022ء سے مارکس شیٹس جاری کردیں گے، مارکس شیٹس ٹاﺅن کی سطح پر اسکول سربراہان کو جاری کی جائیں گی، اس حوالے سے باقاعدہ شیڈول مرتب کر کے آگاہ کر دیا جائے گا۔ ایک سوال کے جواب میں ثانوی تعلیمی بورڈ کراچی کے ناظم امتحانات نے کہا کہ شفاف نتائج کی تیاری اولین ترجیح ہے، نہم جماعت سائنس گروپ کے نتائج مرتب کرنے کا کام تیزی کے ساتھ جاری ہے، قوی امید ہے کہ ماہ نومبر2022ء کے دوسرے ہفتے تک نتائج کا اعلان کردین گے۔
ان کا کہنا تھا کہ بورڈ کے آئی ٹی سیکشن کی نگرانی کا عمل سخت کر دیا گیا ہے جس کا مقصد شفاف نتائج کے اجراء کو یقینی بنانا ہے۔