فضائی آلودگی میں کراچی پہلے نمبر پر آگیا

کراچی(امت نیوز) سمندری ہواؤں کی عارضی بندش اوربلوچستان کی ریگستانی ہواؤں کے زیراثر منگل کو شہرقائد آلودہ ترین شہروں کی فہرست میں پہلے نمبر پررہا۔
ائیر کوالٹی انڈیکس کے مطابق سمندر کی جنوب مغربی ہواؤں کی مختصر وقت کے لیے بندش اور بلوچستان کی گرم ریگستانی ہواؤں کے اثرات کی وجہ سے منگل کو کراچی آلودہ شہروں کی فہرست میں پہلے اور لاہور دوسرے نمبر پر رہا۔
رپورٹ کے مطابق کراچی کی فضاؤں میں آلودہ ذرات کی مقدار 214 پرٹیکیولیٹ میٹرز ریکارڈ ہوئی، جو انتہائی مضر صحت تصور کی جاتی ہے،لاہور168 پرٹیکیولیٹ میٹرز کے ساتھ دنیا کا دوسرا آلودہ ترین شہر قرار پایا۔
ایئرکوالٹی انڈیکس کی درجہ بندی کے مطابق 151 سے 200 درجے تک آلودگی مضر صحت، 201 سے 300 درجے تک آلودگی انتہائی مضر صحت جبکہ 301 سے زائد درجہ خطرناک آلودگی کو ظاہر کرتا ہے۔
محکمہ موسمیات کے مطابق منگل کو کراچی میں حد نگاہ 6 کلومیٹر سے کم ہوکر3 کلومیٹر رہ گئی تھی۔
ماہرین کےمطابق سمندری ہوائیں موسم کو معتدل رکھنے کے علاوہ فلٹر کا بھی کام کرتی ہیں۔