سردیوں میں طویل گیس بندش۔سوشل میڈیا پر زیرگردش اشتہار کی سرکاری تردید

کراچی(اسٹاف رپورٹر)سوئی سدرن گیس کمپنی (ایس ایس جی سی) نے سردیوں میں گیس بندش سے متعلق سوشل میڈیا پر زیرگردش اشتہار کو جعلی قرار دے دیا۔
ترجمان سوئی سدرن گیس کمپنی کی جانب سے جاری بیان میں کہا گیا ہے کہ سوشل میڈیا پوسٹ میں بے بنیاد معلومات دی گئی ہیں، سوئی سدرن بے بنیاد پوسٹ میں درج مواد کی سختی سے تردید کرتی ہے۔
زیرگردش اشتہار کے مطابق 15 اکتوبر سے 15 مارچ تک سندھ اور بلوچستان میں گیس کی لوڈشیڈنگ کا اعلان کیا گیا ہے اور بتایا گیا ہے کہ صارفین کو ہر روز تین مختلف اوقات میں صرف 2، 2 گھنٹے گیس ملے گی۔
مختلف سوشل میڈیا پلیٹ فارمز پر بھی سوئی سدرن گیس کمپنی نے اس اشتہار کی تردید کی ہے۔