اسپیکر کا بڑا فیصلہ ،شاہ محمود پی ٹی آئی کے پارلیمانی لیڈر مقرر

اسلام آباد :  اسپیکر سیکرٹریٹ نے سابق وزیراعظم عمران خان کی جگہ سابق وزیرخارجہ شاہ محمود قریشی کو پی ٹی آئی کا پارلیمانی گروپ لیڈر قرار دے دیا ہے۔ عمران خان کا رکن قومی اسمبلی کی حیثیت سے کردار ختم کردیا گیا ہے۔ اس طرح انہیں تحریک انصاف کے ارکان قومی اسمبلی کے اجتماعی استعفے قبول کرنے کا بھی اختیار نہیں ہوگا۔

سینئر صحافی صالح ظافر کی رپورٹ کے مطابق اسپیکر سیکرٹریٹ کا کہنا ہے استعفے قبول یا مسترد کرنے کا اختیار اسپیکر کو حاصل ہے۔ اسپیکر پہلے ارکان قومی اسمبلی سے انفرادی طور پر ملیں گے پھر فیصلہ آئین اور متعلقہ قوانین کے تحت کیا جائے گا۔ کوئی فیصلہ مسلط نہیں کیا جائے گا۔

صالح ظافر کی رپورٹ کے مطابق اسپیکرقومی اسمبلی راجا پرویز نے واضح طور پر کہا کہ وہ کسی ایک کے کہنے پر تحریک انصاف کے ارکان قومی اسمبلی کے اجتماعی استعفے قبول نہیں کریں گے۔ جب استعفوں پر غور کا وقت یا موقع آئے گا تو ہر رکن سے انفرادی طور پر دریافت کیا جائےگا۔

رپورٹ کے مطابق تحریک انصاف کے سینئر رہنما سابق وزیرخارجہ شاہ محمود قریشی کے لکھے خط کے بارے میں استفسار پر اسپیکر نے کہا کہ وہ شاہ محمود سے استعفے قبول کرنے کے بارے میں ان کی حیثیت دریافت کریں گے۔ تحریک انصاف کے چیئرمین عمران خان کی قومی اسمبلی کی رکنیت کے بارے میں راجا پرویز اشرف نے کہا اگر انہوں نے ایوان زیریں کا رخ کیا تو انہیں باہر کا راستہ دکھادیا جائے گااور وہ رکنیت کےلیے نا اہل قرار دیئے جائیں گے۔