استور میں برفانی تودہ گرنے سے 10 افراد جاں بحق

استور (امت نیوز) شونٹر ٹاپ میں برفانی تودہ گرنے سے10 افراد جاں بحق جبکہ 25 زخمی ہوگئے۔ جاں بحق ہونے والوں میں بابو , شبیر , حمید , نورانی , چار سالہ مہربان , شکیلہ دختر بابو , پروین , خاتون ,ملکہ بی بی شامل ہیں۔ ڈی آئی جی پولیس طفیل احمد کے مطابق آزاد کشمیر کے راستے خانہ بدوش افراد استور کی طرف آرہے تھے کہ شونٹر ٹاپ پر برفانی تودے تلے دب گئے۔واقعے کی اطلاع ملنے پر پولیس اور 1122 کی امدادی ٹیموں کو جائے حادثہ روانہ کیا گیا۔ برفانی تودہ گرنے کے واقعے میں 10 افراد جاں بحق اور 25 زخمی ہوگئے ہیں۔دوسری جانب وزیراعلیٰ گلگت بلتستان خالد خورشید نے گلگت شونٹر ٹاپ پر برفانی تودہ گرنے کے حادثے میں قیمتی انسانی جانوں کے ضیاع پر اظہار افسوس کیا ہے، وہ جلد متاثرہ علاقے کا دورہ بھی کریں گے۔وزیراعلیٰ گلگت بلتستان خالد خورشید نے انتظامیہ، ریسکیو 1122 اور محکمہ صحت کو تودے تلے دبے افراد کو نکالنے کے لیے تمام تر دستیاب وسائل بروئے کار لانے کا حکم دے دیا۔خالد خورشید نے سیکرٹری داخلہ، ڈی جی جی بی ڈی ایم اے و دیگر اعلی حکام کو فوری طور استور پہنچنے اور کنٹرول روم قائم کرنے کی ہدایت کی ہے۔