آصف زرداری سمیت دیگر افراد کیخلاف 4 ریفرنسز نیب کو واپس

اسلام آباد: احتساب عدالت نے سابق صدر آصف زرداری اور دیگرملزمان کے خلاف جعلی اکاؤنٹس کیسز کی سماعت کے دوران 4 ریفرنسز نیب کو واپس بھجوا دیے۔

حتساب عدالت میں پیپلز پارٹی کے شریک چیئرمین آصف علی زرداری و دیگر ملزمان کے خلاف جعلی اکاؤنٹس کیسز پر سماعت ہوئی، جج محمد بشیر نے فریقین کے دلائل سننے کے بعد فیصلہ سنایا، آصف زرداری کے وکیل فاروق نائیک اور نیب پراسیکیوٹرز عدالت پیش ہوئے۔

فاروق ایچ نائیک نے دلائل دیتے ہوئے کہا کہ نیب قانون میں ترمیم کے بعد یہ ریفرنسز عدالت کے دائرہ اختیار میں نہیں، احتساب عدالت ریفرنسز پر ٹرائل نہیں چلا سکتی۔

عدالت نے سابق صدر آصف زرداری، فریال تالپور، حسین لوائی اور دیگر کے خلاف منی لانڈرنگ ریفرنس نیب کو واپس بھجوا دیے۔

علاوہ ازیں منظور قادر اور دیگر ملزمان کے خلاف پلاٹ الاٹمنٹ ریفرنس بھی نیب کو واپس بھجوا دیے جبکہ بلال شیخ اور دیگر ملزمان کے خلاف سندھ بینک ریفرنس بھی واپس بھیج دیا گیا۔احتساب عدالت نے پنک ریڈیڈنسی ریفرنس بھی نیب کو واپس بھجوا دیا ہے۔

واضح رہے کہ پیپلز پارٹی کے شریک چیئرمین آصف زرداری کے خلاف 4 نیب ریفرنسز پہلے ہی نیب کو واپس ہو چکے ہیں۔