کورنگی میں کارخانے کی چھت منہدم،11افراد زخمی

کراچی کے علاقے کورنگی میں کارخانے کی چھت منہدم ہوگئی جس کے نتیجے میں 11 افراد زخمی ہوگئے۔ پولیس کا کہنا ہے کہ مزدور نے چولہا جلایا تو گیس لیکج کے باعث زور دار دھماکا ہوگیا۔

کورنگی میں چھت گرنے کا واقعہ پی این ٹی کالونی کے قریب پیش آیا۔چھت گرنے کے فوری بعد ریسکیو ٹیمیں جائے وقوعہ پر پہنچیں اور امدادی سرگرمیاں انجام دیں۔

ریسکیو حکام کے مطابق ملبے میں دبنے والے تمام 11 افراد کو اسپتال منتقل کردیا گیا۔اتوار کی وجہ سے معمول سے کم افراد کارخانے میں موجود تھے۔

پولیس کے مطابق واقعہ پاپے بنانے کی فیکٹری میں پیش آیا۔ کارخانے میں مزدور چائے بنا رہا تھا، جیسے ہی چولہا جلایا تو گیس لیکج کے باعث زور دار دھماکا ہوگیا۔دھماکے کے فوری بعد کارخانے کی چھت گر گئی، جس کے نتیجے میں لوگ زخمی ہوئے۔