مہنگی گیس کیخلاف کراچی کی تمام صنعتوں میں4 دسمبر کو ہڑتال کا اعلان

کراچی: تمام صنعتوں نے مہنگی گیس کیخلاف 4 دسمبر کو ہڑتال کا اعلان کردیا۔

گیس ٹیرف میں ہوشربا اضافے اور فرٹیلائزر سیکٹر کو کراس سبسڈی پر گیس کی فراہمی کیخلاف کراچی کے ساتوں صنعتی علاقوں کی نمائندہ انجمنوں نے بطور احتجاج 4 دسمبر کو ایک روزہ ہڑتال کا اعلان کردیا ۔

یہ اعلان سائٹ ایسوسی ایشن آف انڈسٹری میں جمعرات ساتوں صنعتی علاقوں کی انجمنوں کے نمائندوں پر مشتمل مشترکہ پریس کانفرنس میں کیا گیا ہے۔

کراچی انڈسٹریل الائنس کے کوآرڈینیٹر جاوید بلوانی نے پریس کانفرنس سے خطاب کرتے ہوئے کہاکہ 4 دسمبر کو کراچی کی تمام صنعتیں پہلی ہڑتال پرایک روز کے لیے بند رہیں گی، اگر حکومت نے پھر بھی گیس ٹیرف پر نظرثانی نہ کی تو مزید ہڑتالوں کا اعلان کیا جائے گا۔

انھوں نے کہا کہ فی الوقت صرف صنعت کار ہی گیس کی قیمت میں ہوشربا اضافے سے پریشان ہیں، ہڑتال کے فیصلے پر ایف پی سی سی آئی اور کراچی چیمبر آف کامرس کی مکمل حمایت بھی حاصل ہے، ایک روزہ ہڑتال کے باوجود حکومت نے صنعتی شعبے کو درپیش اس اہم مسلے پر توجہ نہ دی تو برآمدی صنعتیں بند کردیں گے.

جاوید بلوانی نے بتایا کہ احتجاجی ہڑتال میں سندھ اور بلوچستان کے صنعتکار بھی شامل ہوجائیں گے، سندھ اور بلوچستان کی صنعتی انجمنیں اپنی جنرل باڈی اجلاس میں جلد یہ فیصلہ کریں گی۔