افغانستان میں را سے ٹریننگ حاصل کرنے والے دہشت گرد کو 14 سال قید

حیدرآباد: انسداد دہشتگردی عدالت (اے ٹی سی) نے افغانستان میں را سے ٹریننگ حاصل کرنے والے دہشت گرد کو 14 سال قید کی سزا سنادی۔

کیس کی سماعت حیدرآباد کی سینٹرل جیل میں ہوئی، جس میں اے ٹی سی کے دو ججز نے ملزم منیر ابڑو پر الزام ثابت ہونے پر فیصلہ سنایا۔

واضح رہے کہ کاؤنٹر ٹیررازم ڈیپارٹمنٹ (سی ٹی ڈی) کی جانب سے جاری بیان کے مطابق ملزم کو 15 فروری 2023 کو جامشورو سے گرفتار کیا گیا تھا۔

سی ٹی ڈی حکام کے مطابق گرفتار ملزم منیر ابڑو کالعدم دہشتگرد تنظیم سندھو دیش ریوولیوشنری آرمی (ایس آر اے) کا کمانڈر تھا، جو ریلوے اور چائنیز نیشنلز پر حملوں سمیت دیگر کارروائیوں میں ملوث تھا۔گرفتار دہشت گرد سے بارودی مواد برآمد کیا گیا تھا۔