2 ججز کیخلاف سوشل میڈیا مہم، توہین عدالت کیس سماعت کیلیے مقرر

اسلام آباد ہائیکورٹ نے 2 ججزکے خلاف سوشل میڈیا مہم سے متعلق توہین عدالت کی کارروائی کے لیے کیسز 14 مئی کو سماعت کے لیے مقرر کردیے جبکہ رجسٹرار آفس نے بینچ تشکیل دینے کے بعد کیسزکی کاز لسٹ جاری کر دی۔

اسلام آباد ہائیکورٹ کے جسٹس محسن اختر کیانی اور جسٹس بابر ستار کے خلاف سوشل میڈیا پر مہم چلانے والوں کے خلاف توہین عدالت کیس سماعت کے لیے مقرر کردیا گیا۔اسلام آباد ہائیکورٹ نے 3 رکنی 2 بینچز تشکیل دے دیے جبکہ سماعت 14 مئی کو ہوگی۔

جج جسٹس محسن اخترکیانی کی شکایت پر چیف جسٹس عامر فاروق کی سربراہی میں لارجر بینچ سماعت کرے گا، جس میں جسٹس میاں گل حسن اورنگزیب اور جسٹس ارباب محمد طاہر شامل ہیں۔

جسٹس بابرستار کی شکایت پر لارجر بینچ جسٹس محسن اخترکیانی کی سربراہی میں تشکیل دیا گیا ہے۔

جسٹس طارق محمود جہانگیری اور جسٹس سرداراعجاز اسحاق خان لارجر بینچ میں شامل ہیں، دونوں لارجر بینچ توہین عدالت کیسز کی سماعت کریں گے۔