9مئی مقدمات: شاہ محمود سمیت پی ٹی آئی رہنمائوں اور کارکنوں پرترمیمی فرد جرم عائد

لاہور: انسداد دہشت گردی عدالت نے نومئی کو جناح ہاوس کے قریب پولیس کی گاڑیاں جلانے کے تین مقدمات میں شاہ محمود قریشی سمیت پی ٹی آئی رہنماوں اور کارکنوں پر ترمیمی فرد جرم عائد کردی گئی۔

نجی ٹی وی کے مطابق انسداد دہشتگردی عدالت کے جج منظر علی گل نے کوٹ لکھپت جیل میں مقدمے کی سماعت کی، ملزموں نے ترمیمی فرد جرم کی صحت جرم سے انکار کیا۔

عدالت نے تینوں مقدمات میں ملزموں پر ترمیمی فرد جرم عائد کی ہے، شاہ محمود قریشی سمیت دیگر پر دوبارہ فرد جرم عائد کی گئی، شاہ محمود قریشی، عمر سرفراز چیمہ اور ڈاکٹر یاسمین راشد سمیت دیگر زیر حراست ملزموں کی حاضری مکمل کی گئی۔

عدالت میں عالیہ حمزہ ،صنم جاوید اور خدیجہ شاہ سمیت دیگر ملزم پیش ہوئے، عدالت نے 6 مارچ کو گواہوں کو بیان ریکارڈ کرانے کیلئے طلب کر لیا۔
دوسری جانب پراسیکیوشن نے تمام دفعات کے مطابق فرد جرم میں ترمیم کی استدعا کی تھی، عدالت نے پراسیکیوشن کو فرد جرم میں ترمیم کی اجازت دی تھی۔

واضح رہے پی ٹی آئی رہنماوں اور کارکنوں پر بغاوت اور کارکنان کو فسادات پر اکسانے کے الزام پر سنگین دفعات کے تحت مقدمات درج ہیں۔