سونا مزید 1800 روپے مہنگا، تاریخ کی نئی بلند ترین سطح پر پہنچ گیا

کراچی: عالمی اور مقامی مارکیٹوں میں سونے کی قیمت میں مسلسل اضافہ دیکھنے میں آ رہا ہے، پاکستان میں فی تولہ سونے کی قیمت میں 1800 روپے کا اضافہ ہوگیا۔

عالمی مارکیٹ میں اضافے کے باعث مقامی صرافہ مارکیٹوں میں بھی جمعرات کو 24 قیراط کا حامل فی تولہ سونے کی قیمت 1800 روپے کے اضافے سے 3 لاکھ 20 ہزار 800 روپے کی نئی بلند ترین سطح پرآ گئی۔

اس کے علاوہ ملک میں فی 10گرام سونے کی قیمت بھی 1543روپے کے اضافے سے 2 لاکھ 75 ہزار 034 روپے کی نئی بلند ترین سطح پرآ گئی۔

اس کے برعکس فی تولہ چاندی کی قیمت 31روپے کی کمی سے 3524 روپے کی سطح پر آگئی اور فی دس گرام چاندی کی قیمت بھی 26 روپے کی کمی سے 3021 روپے کی سطح پرآ گئی۔

بین الاقوامی بلین مارکیٹ میں فی اونس سونے کی قیمت 12 ڈالر کے اضافے سے 3050 ڈالر کی نئی بلند ترین سطح پر پہنچ گیا۔