53 کروڑ کا فراڈ کیس : اداکارہ نادیہ حسین کی عبوری ضمانت منظور

ایڈیشنل ڈسٹرکٹ اینڈ سیشن جج ساؤتھ کی عدالت میں 53 کروڑ روپے کے مبینہ فراڈ کیس کی سماعت کے دوران عدالت نے معروف اداکارہ نادیہ حسین کی عبوری ضمانت کی توثیق کر دی، جب کہ شریک ملزمان امتیاز احمد اور فیصل کی درخواستیں مسترد کر دی گئیں۔

عدالتی فیصلے کے بعد دونوں ملزمان فیصل اور امتیاز کمرہ عدالت سے فرار ہو گئے۔ عدالت کے احاطے میں موجود پولیس اہلکار ملزمان کو گرفتار کرنے میں ناکام رہے، جس پر سیکیورٹی اقدامات پر بھی سوالات اٹھائے جا رہے ہیں۔

عدالت نے اداکارہ نادیہ حسین کی عبوری ضمانت پہلے ہی 50 ہزار روپے کے مچلکوں کے عوض منظور کی تھی، جسے آج توثیق کر دیا گیا۔

ذرائع کے مطابق امتیاز احمد اور فیصل پر الزام ہے کہ انہوں نے اداکارہ کے شوہر عاطف خان کے ساتھ مل کر ایک شہری عاطف خان کے ساتھ کروڑوں روپے کا مالی فراڈ کیا۔ عدالت نے اس سے قبل عاطف خان کی ضمانت بھی مسترد کر دی تھی۔

عدالت میں دائر درخواستوں میں کہا گیا کہ تینوں افراد نے مل کر سرمایہ کاری کے نام پر 53 کروڑ روپے ہتھیائے۔ عدالت نے کیس کی مزید سماعت آئندہ تاریخ تک ملتوی کر دی ہے۔