بھارتی خوشنودی کیلیے پی ٹی آئی کی سرگرمیاں جاری

امت رپورٹ:

تحریک انصاف کی جانب سے ملک دشمن سرگرمیوں کا سلسلہ جاری ہے۔ اس حوالے سے احتجاج کی تازہ کال فیلڈ مارشل چیف آف آرمی اسٹاف جنرل عاصم منیر کے دورہ امریکہ کے موقع پر دی گئی ہے۔ پی ٹی آئی کا سوشل میڈیا ایک منظم کمپین چلا رہا ہے کہ جنرل عاصم منیر کے دورہ امریکہ کے موقع پر14جون کو واشنگٹن میں پاکستانی سفارتخانے کے سامنے بھرپور احتجاج کیا جائے۔

اطلاعات ہیں کہ اس احتجاج میں بھارتی شہری بھی شامل ہوں گے۔ اس احتجاج کے حوالے سے امریکہ میں مقیم عمران خان کے رشتہ دار اور پی ٹی آئی کے انٹرنیشنل چیپٹر کے سیکریٹری سجاد برکی نے ایک ویڈیو پیغام بھی جاری کیا ہے، اور وہ ہی اس نام نہاد مظاہرے کی قیادت کر رہا ہے۔ سجاد برکی کا دعویٰ ہے کہ امریکہ کے علاوہ برطانیہ اور یورپ کے دیگر ممالک سے بھی پی ٹی آئی کے ورکرز اس احتجاج میں شریک ہوں گے۔

واضح رہے کہ دو ہزار تئیس کے اعداد و شمار کے مطابق امریکہ میں پاکستانیوں کی تعداد چھ لاکھ اسّی ہزار تھی۔ تاہم ایک محتاط اندازے کے مطابق اب یہ تعداد آٹھ لاکھ تک ہو سکتی ہے۔ اسی طرح دو ہزار اکیس کے اعداد و شمار کے مطابق برطانیہ میں پاکستانیوں کی تعداد سولہ لاکھ باسٹھ ہزار تھی، جو اب محتاط اندازے کے مطابق بیس سے بائیس لاکھ کے قریب ہے۔

اسی طرح یورپ کے مختلف ممالک میں مقیم لاکھوں پاکستانیوں کو بھی شامل کرلیا جائے تو ان تین ملین سے زائد پاکستانیوں میں سے مٹھی بھر پی ٹی آئی کے کارندے ہی بیرون ملک پاکستان مخالف مظاہروں میں شرکت کرتے ہیں، جو ایک فیصد بھی نہیں۔ اس سے ثابت ہوتا ہے کہ ملک دشمن سرگرمیوں سے اوورسیز پاکستانیوں کی ننانوے فیصد تعداد دور رہتی ہے اور ان کا دل پاکستان کے ساتھ دھڑکتا ہے۔ اس کا ثبوت حال ہی میں پاکستان میں ہونے والا اوورسیز کنونشن ہے۔

اس تناظر میں فیلڈ مارشل عاصم منیر کے دورہ امریکہ کے موقع پر پی ٹی آئی کے اعلان کردہ نام نہاد احتجاج میں بھی چند درجن ملک دشمن عناصر کی شمولیت ہی متوقع ہے۔ وہ بھی پاکستانی سفارتخانے کے سامنے، جو وائٹ ہائوس اور کیپیٹل ہل سے کافی فاصلے پر ہے۔ اس سے فیلڈ مارشل کا دورہ امریکہ ذرہ برابر متاثر ہونے کا امکان نہیں۔ تاہم اس سے پاکستان کا ازلی دشمن بھارت ضرور خوش ہوگا، جسے حال ہی میں پاک افواج نے ذلت آمیز شکست سے دو چار کیا ہے۔ اور شاید پی ٹی آئی کا مقصد بھی اس شاندار فتح کو دھندلانے کی مکروہ کوشش ہے۔ اس کا اظہار سوشل میڈیا پر بھی کیا جارہا ہے۔

احتجاج سے متعلق سجاد برکی کی پوسٹ کے نیچے محب وطن پاکستانیوں نے اسے آئینہ دکھایا ہے۔ ایک صارف امیر دانش نے لکھا ’’جو بھی اس احتجاج میں شامل ہوگا، وہ ہمارے دشمن بھارت کے ایجنڈے پر چل رہا ہے‘‘۔ نو نیم نامی ایک اور صارف نے سجاد برکی کو مخاطب کرتے ہوئے کہا ’’تم بھی دوغلے آدمی ہو۔ کبھی منتیں کرتے ہو اور کبھی احتجاج کی کال دیتے ہو۔ بابا جی پر اس عمر میں بھی پیسے اور شہرت کا بھوت سوار ہے۔ آرام کرو اور ملک فروشی چھوڑ دو‘‘۔ ایک صارف طاہر اسماعیل نے پوسٹ کی ’’اسرائیل، بھارت اور اس کے حامیوں کا احتجاج سمجھ میں آتا ہے۔ کیونکہ مودی کے پاکستان میں افرا تفری پھیلانے کا خواب ہمارے بہادر چیف اور فیلڈ مارشل نے چکنا چور کر دیا ہے‘‘۔

تیرا بھائی نامی ایک صارف نے لکھا ’’سو بندہ بھی نہیں آئے گا۔ البتہ دیہاڑی پر بہت سے لوگ لائے جائیں گے‘‘۔ ایک صارف احمد اعجاز نے لکھا ’’ایک ایسے موقع پر جب ہم ابھی روایتی دشمن بھارت کے ساتھ حالت جنگ میں ہیں، اس طرح کا احتجاج سوائے ملک دشمنی کے اور کچھ نہیں‘‘۔

اس احتجاج کو بوڑھا سجاد برکی لیڈ کر رہا ہے۔ جبکہ پی ٹی آئی امریکہ کا پورا چیپٹر سوشل میڈیا پر اس سلسلے میں کمپین چلا رہا ہے۔ پاکستان سے فرار ہوکر امریکہ میں پناہ لینے والا شہباز گل اور پی ٹی آئی برطانیہ کے صدر ملک عمران خلیل اور دیگر بھی اس میں پیش پیش ہیں۔ وفاقی وزیر برائے پلاننگ اینڈ ڈویلپمنٹ احسن اقبال نے بھی اس معاملے پر ایکس پر پوسٹ کی ہے، جس میں کہا ہے ’’اب یہ شک و شبہ سے بالاتر ہے کہ تحریک انصاف، پاکستان کو بدنام کرنے اور اس کی عسکری قیادت کی ساکھ مجروح کرنے کے لیے بھارتی بیانیہ کو آگے بڑھا رہی ہے۔

اس صف بندی کے کئی مقاصد ہیں۔ قومی اداروں کو اندر سے غیر مستحکم کرنا، پاکستان کے پُرعزم اور اسٹرٹیجک فوجی رد عمل کے نتیجے میں بھارت کو ہونے والی ذلت سے عالمی توجہ ہٹانا۔ ہماری خود مختاری کی محافظ افواج کو نشانہ بناکر پی ٹی آئی نہ صرف قومی اتحاد کو نقصان پہنچارہی ہے، بلکہ براہ راست ملک دشمنوں کے ہاتھوں میں کھیل رہی ہے‘‘۔