مولانا فضل الرحمٰن کے بھائی نے علی امین گنڈاپور کا الیکشن لڑنے کا چیلنج قبول کرلیا

پشاور: جمعیت علمائے اسلام (ف) کے سربراہ مولانا فضل الرحمان کے بھائی انجینیئر ضیا الرحمٰن نے وزیراعلیٰ خیبرپختونخوا علی امین گنڈاپور کا الیکشن لڑنے کا چیلنج قبول کرلیا۔

خیبرپختونخوا میں سیاسی تبدیلی اور سینیٹ الیکشن کے معاملے پر سربراہ جے یو آئی (ف) مولانا فضل الرحمٰن کے بھائی ضیا الرحمٰن اور وزیراعلیٰ خیبرپختونخوا علی امین گنڈا پور کے بھائی عمرامین گنڈا پورآمنے سامنے آگئے۔

وزیراعلیٰ خیبرپختونخوا علی امین گنڈا پور نے مولانا فضل الرحمٰن کو الیکشن لڑنے کا چیلنج دیا، جس پر مولانا فضل الرحمٰن کے بھائی ضیا الرحمٰن نے الیکشن لڑنے کا چیلنج قبول کرلیا۔

مولانا فضل الرحمن کے چھوٹے بھائی انجینئر ضیا الرحمٰن نے اپنے ویڈیو بیان میں کہا کہ علی امین گنڈا پور تمہارا چیلنج قبول ہے، تمہاری اوقات نہیں کہ مولانا فضل الرحمان تمہارا چیلنج قبول کرے۔

انجینئر ضیاء الرحمان نے علی امین گنڈا پور کو مخاطب کرتے ہوئے کہا کہ پہلے تم مفتی محمود کے اس بیٹے سے مقابلہ کرکے دکھاؤ، مولانا فضل الرحمٰن نے تو تمہارے لیڈر کو اقتدار کی کرسی سے گھسیٹ کر نکالا تھا، تم اپنے بھائی سے استعفیٰ دلوا کر ان کا مجھ سے مقابلہ کراؤ۔