دولت کی خاطر 11 شوہروں کو قتل کرنے والی بیوہ

امت رپورٹ :

دولت کی خاطر 11 شوہروں کو زہر دے کر جان سے مارنے والی بدنام زمانہ ’’سیاہ بیوہ‘‘ کو پھانسی جیسی سزا کا سامنا ہے۔ چھپن سالہ ایرانی خاتون کلثوم اکبری پر الزام ہے کہ اس نے مالی فائدے کے لیے پچھلے 22 برس کے دوران کم از کم 11 بوڑھے شوہروں کو زہر دے دیا۔ اس نے اپنے جرائم کو اس وقت تک چھپایا جب تک کہ حالیہ تحقیقات نے اسے بے نقاب نہیں کیا۔ ایران میں’’سیاہ بیوہ‘‘ کے نام سے جانی جانے والی اس انوکھی خاتون کے کیس نے عوام کو چونکا دیا ہے اور ایک ہائی پروفائل قانونی جنگ کو جنم دیا ہے۔

کلثوم اکبری نے اپنے بوڑھے شوہروں کو منظم اور شاطرانہ طریقے سے قتل کیا۔ یہ سلسلہ سن دو ہزار کے لگ بھگ شروع ہوا اور دو ہزار تئیس تک جاری رہا۔ وہ شادی کے لئے ایسے دولت مند بوڑھوں کا انتخاب کیا کرتی تھی جو پہلے ہی مختلف بیماریوں میں مبتلا ہوتے تھے۔ پھر وہ انہیں نشہ آور، سکون آور اور ذیابیطس کی ادویات کی مہلک اضافی خوراکیں دیتی، ساتھ میں دیسی الکحل بھی دیتی۔ یوں پہلے ہی مختلف بیماریوں کے شکار بوڑھے شوہر آہستہ آہستہ موت کے منہ میں چلے جاتے اور کسی کو شک نہیں ہوتا تھا۔ ہر شوہر کو ٹھکانے لگانے کے بعد وہ اس کی جائیداد پر قبضہ کرکے نیا شکار تلاش کرتی اور اس کی زندگی کا چراغ بجھانے کے لئے بھی اپنا وہی پرانا اور آزمودہ طریقہ اختیار کرتی ۔

اپنے ہر شوہر کی موت کے بعد، کلثوم اکبری مبینہ طور پر متوفی کی دولت اور جائیداد کو اپنی بیٹی کے نام منتقل کر دیا کرتی تھی، جس سے اس کے خاندان کی خوش قسمتی میں مسلسل اضافہ ہوا۔ ایرانی حکام کا اندازہ ہے کہ اکبری نے دو دھائیوں کے عرصے میں متعدد مردوں کو قتل کیا، حالانکہ صحیح تعداد غیر یقینی ہے، کیونکہ اکبری خود تفتیش کے دوران مکمل گنتی کی تفصیل بتانے سے قاصر رہی۔ اس کیس میں پیش رفت دو ہزار تئیس میں اکبری کے تازہ ترین شوہر غلام رضا بابائی کی مشتبہ موت کے بعد ہوئی۔ مشکوک حالات اور اس کے بیٹے کی سچائی کی تلاش میں جستجو نے تحقیقات کو آگے بڑھایا۔ تب یہ انکشاف ہوا کہ اکبری نے اس سے پہلے بھی دو شوہروں کو زہر دینے کی کوشش کی تھی، جس میں ایک شخص دو ہزار بیس میں بچ گیا تھا، تاہم ابتدائی طور پر اس معاملے کو نظر انداز کیا گیا تھا۔

گرفتاری کے بعد کلثوم اکبری نے اپنے جرائم کا اعتراف کیا اور دوران تفتیش اشارہ دیا کہ متاثرین کی کل تعداد پندرہ تک ہو سکتی ہے۔ اس انکشاف نے نہ صرف متاثرین کے اہل خانہ بلکہ ایرانی عوام کو بھی چونکا دیا۔ اس کے بعد سے پینتالیس سے زائد افراد انصاف کے حصول کے لیے آگے بڑھے ہیں اور اس کیس میں مدعی ہیں۔ فی الحال ایران کی انقلابی عدالت میں مقدمے کی سماعت کے منتظر اس کیس نے پیچیدہ قانونی اور اخلاقی سوالات کو جنم دیا ہے۔ جب کہ اکبری کے دفاعی وکلا نے نفسیاتی تشخیص کی درخواست کی ہے، جس میں ملزمہ کی دماغی صحت کے ممکنہ مسائل کو جواز بنانے کی کوشش کی گئی ہے ۔ تاہم متاثرین کے اہل خانہ اس دعوے کی سختی سے مخالفت کرتے ہیں۔ ان کا استدلال ہے کہ قتل کر نے کی شاطرانہ منصوبہ بندی اور اس پر پورے بائیس برس تک بار بار عمل درآمد واضح کرتا ہے کہ ملزمہ کسی قسم کے ذہنی عدم استحکام کا شکار نہیں۔

ایران کا قانونی نظام سنگین جرائم کے لیے سزائے موت کی اجازت دیتا ہے اور متاثرین کے اہل خانہ اکبری کے لیے سزائے موت پر اصرار کر رہے ہیں۔ توقع ہے کہ اس مقدمے کو ملکی اور بین الاقوامی سطح پر قریب سے دیکھا جائے گا، کیونکہ یہ کیس ایران میں جرائم، انصاف اور مشتبہ سیریل کلرز کے قانونی ہینڈلنگ کے مسائل پر توجہ دلاتا ہے۔ کلثوم اکبری کے خلاف الزامات نے ایرانی معاشرے کو جھنجھوڑ کر رکھ دیا ہے اور خاندانوں میں اعتماد اور خیانت کی نوعیت کے بارے میں بڑے پیمانے پر بحث کو جنم دیا ہے۔

یہ حقیقت کہ یہ جرائم مبینہ طور پر دو دہائیوں پر محیط ہیں، قانون نافذ کرنے والے اداروں کی اس طرح کے جرائم کو ابتدائی طور پر نوٹس کرنے کی صلاحیت کے بارے میں بھی پریشان کن سوالات اٹھ رہے ہیں۔ جیسے جیسے مقدمے کی سماعت آگے بڑھ رہی ہے، بہت سے لوگ اس فیصلے کا انتظار کر رہے ہیں جو اپنے پیاروں کے کھو جانے سے تباہ ہونے والے خاندانوں کو انصاف فراہم کرے گا۔ سماعت کے دوران چار مقتولین کے اہل خانہ نے اکبری کو سزائے موت دینے کا مطالبہ کیا۔ اکبری کو سوچے سمجھے قتل کے 11 الزامات اور قتل کی کوشش کے ایک الزام کا سامنا ہے۔