جنوبی افریقا نے پنڈی ٹیسٹ میں پاکستان کو شکست دے دی،سیریز برابر

راولپنڈی: جنوبی افریقا نے پنڈی ٹیسٹ میں پاکستان کو دوسری اننگز میں ناقص بیٹنگ کی وجہ سے شکست دے دی۔ پاکستان نے مہمان ٹیم کو 68 رنز کا ہدف دیا، جسے جنوبی افریقی ٹیم نے صرف 2 وکٹوں کے نقصان پر حاصل کر لیا۔ اس کے ساتھ ہی دو ٹیسٹ پر مشتمل سیریز 1-1 سے برابر ہو گئی۔

پنڈی ٹیسٹ کے چوتھے دن کے آغاز سے ہی پاکستان مشکلات میں رہا۔ کھیل کے آغاز میں بابر اعظم 50 رنز بنا کر آوٹ ہوئے جبکہ محمد رضوان 18 رنز پر پویلین لوٹے۔ سلمان علی آغا 28 اور ساجد خان 13 رنز بنا کر آوٹ ہوئے، نعمان علی اور شاہین شاہ آفریدی صفر رنز پر آوٹ ہوئے جبکہ آصف آفریدی صفر رنز کے ساتھ ناٹ آوٹ رہے۔

جنوبی افریقا کی جانب سے سیمن ہارمر نے 6 وکٹیں حاصل کیں، کیشو مہراج نے 2 اور کگیسو ربادا نے ایک وکٹ اپنے نام کی۔ دوسری اننگز میں ایڈم مرکرم نے 42 رنز بنائے جبکہ ٹرسٹن اسٹبز صفر رنز پر آوٹ ہوئے، ریان ریکلٹن 25 رنز کے ساتھ ناٹ آوٹ رہے۔

پاکستان نے پہلی اننگز میں 333 رنز بنائے جبکہ مہمان ٹیم نے اس کا جواب 404 رنز سے دیا تھا۔