مولانا فضل الرحمٰن کی تحریکِ انصاف کے وفد سے ملاقات، قومی جرگے اور اپوزیشن اتحاد پر مشاورت

جمعیت علمائے اسلام (جے یو آئی) کے سربراہ مولانا فضل الرحمٰن نے تحریکِ انصاف کے وفد سے ملاقات کی،ملاقات میں  قومی جرگہ کے انعقاد کی تجویز پر مشاورت کی گئی ۔

تفصیلات کے مطابق جمعیت علمائے اسلام (جے یو آئی) کے سربراہ مولانا فضل الرحمٰن کی جانب سے تحریکِ انصاف کے وفد کے اعزاز میں عشائیہ دیا گیا۔

پی ٹی آئی کے وفد میں سابق اسپیکر اسد قیصر، صوبائی صدر جنید اکبر اور شہرام ترکئی جبکہ جے یو آئی کے وفد میں مولانا صلاح الدین ایوبی، جلال الدین ایڈووکیٹ اور مولانا اسجد محمود شامل تھے۔ملاقات کے دوران رہنماؤں میں موجودہ ملکی، سیاسی اور خطے کی صورتحال پر گفتگو ہوئی۔

پی ٹی آئی کے وفد نے مولانا فضل الرحمٰن سے کے پی میں امن وامان سے متعلق  قومی جرگہ کے انعقاد کی تجویز پر مشاورت کی۔

جے یو آئی کی جانب سے جاری کیے گئے اعلامیے کے مطابق مولانا فضل الرحمٰن کی جانب سے قومی جرگے کی تجویز کا خیر مقدم کیا گیاہے۔ ملاقات میں محمود خان اچکزئی کے بطور اپوزیشن لیڈر نامزدگی پر اتفاق کیا گیا۔

پی ٹی آئی کے وفد نے مولانا فضل الرحمٰن سے پارلیمنٹ میں اپوزیشن کو متحد کرنے کے لیے کردار ادا کرنے کی بھی اپیل کی اور کے پی اسمبلی میں سینیٹ کی خالی نشست پر جے یو آئی سے تعاون کی درخواست بھی کی ہے۔