پنجاب میں بڑھتی اسموگ،اسکولوں کے اوقات کار میں تبدیلی کا اعلان

لاہور: محکمہ ماحولیات پنجاب نے صوبے بھر میں بڑھتی ہوئی اسموگ کے پیش نظر تمام سرکاری و نجی اسکولوں کے اوقات کار میں تبدیلی کر دی ہے۔

محکمہ ماحولیات کی جانب سے جاری نوٹیفکیشن کے مطابق لاہور سمیت پنجاب کے تمام اضلاع میں اسکول، کالجز اور اسپیشل ایجوکیشن سینٹرز صبح 8 بج کر 45 منٹ سے پہلے نہیں کھلیں گے۔

یہ حکم نامہ 3 نومبر 2025 سے 31 جنوری 2026 تک نافذ العمل رہے گا۔

اعلامیے میں کہا گیا ہے کہ خلاف ورزی کرنے والے اداروں پر سخت کارروائی ہوگی، پہلی بار خلاف ورزی پر 1 سے 5 لاکھ روپے جبکہ دوبارہ خلاف ورزی کی صورت میں 6 سے 10 لاکھ روپے جرمانہ کیا جائے گا۔

ڈی جی ماحولیات پنجاب عمران حامد شیخ کا کہنا ہے کہ ماحولیاتی تحفظ اور عوام کی صحت کے تحفظ کے لیے سخت اقدامات جاری رہیں گے۔