بٹ کوائن کی قیمت 4 ماہ کی کم ترین سطح پر پہنچ گئی

دنیا کی سب سے بڑی کرپٹو کرنسی بٹ کوائن کی قیمت چار ماہ کی کم ترین سطح پر پہنچ گئی ہے۔ جون کے بعد پہلی بار بٹ کوائن کی قیمت ایک لاکھ ڈالر سے بھی نیچے گر کر 99,936 ڈالر ریکارڈ کی گئی، جو پچھلے ماہ ایک لاکھ 26 ہزار ڈالر تک پہنچنے کے بعد تقریباً 20 فیصد کمی کے برابر ہے۔

بٹ کوائن کے علاوہ دیگر ڈیجیٹل کرنسیوں کی قدر میں بھی گراوٹ دیکھی گئی۔ ایتھیریم کی قیمت میں 10 فیصد جبکہ ایکس آر پی کی قدر میں 6 فیصد کمی ریکارڈ کی گئی۔

بٹ کوائن کی قیمت میں کمی کے اثرات امریکی اسٹاک مارکیٹس پر بھی پڑے، جہاں ایس اینڈ پی 500 انڈیکس میں 1.2 فیصد اور نیسڈیک میں 2 فیصد کمی ہوئی۔

امریکی میڈیا کے مطابق، ڈیجیٹل کرنسیوں کی حالیہ گراوٹ کی ایک بڑی وجہ سرمایہ کاروں کے محتاط رویے اور بڑھتی ہوئی غیر یقینی صورتحال ہے، جس نے مارکیٹ میں مندی کا رجحان پیدا کیا ہے۔