گھوٹکی:رونتی کچا آپریشن میں مارے گئے 8 ڈاکوؤں کی شناخت مکمل

گھوٹکی: رونتی کچا علاقے میں کیے گئے پولیس اور رینجرز کے مشترکہ آپریشن میں مارے جانے والے 8 مطلوب ڈاکوؤں کی شناخت کر لی گئی ہے۔

ڈی آئی جی سکھر فیصل عبداللہ کے مطابق ہلاک ہونے والے ڈاکو سندھ و پنجاب کے سنگین جرائم میں انتہائی مطلوب تھے۔ اس آپریشن کے دوران 20 سے زائد دیگر انعام یافتہ ڈاکو زخمی بھی ہوئے۔ رینجرز اور وفاقی سول انٹیلی جنس ایجنسی نے مکمل معاونت فراہم کی۔

ڈی آئی جی نے بتایا کہ مجموعی طور پر 12 ڈاکو ہلاک ہوئے اور ایک پولیس اہلکار شہید ہوا۔ ہلاک شدگان میں سوبو عرف گونو شر شامل تھا، جو 13 سنگین مقدمات میں مطلوب تھا، جن میں پولیس اہلکاروں کے قتل کے کیسز بھی شامل ہیں۔

اکبر عرف اکبری شر 17 سے زائد سنگین جرائم میں ملوث تھا، شاہنواز عرف شاہوکوش 12 پولیس اہلکاروں کے قتل میں ملوث تھا اور اس پر 50 لاکھ روپے انعام تھا۔ جاگن عرف ودیوکوش 5 پولیس افسران و اہلکاروں کے قتل میں مطلوب تھا، جبکہ غلام عرف جانب شر 21 سے زائد مقدمات اور متعدد اہلکاروں کے قتل میں مطلوب تھا۔

ڈی آئی جی نے مزید بتایا کہ نذیر شر 8 سے زائد سنگین مقدمات میں مطلوب تھا، غشو عرف گل شیر 3 مقدمات میں مطلوب تھا، جبکہ قربان شر کا کرمنل ریکارڈ حاصل کیا جا رہا ہے۔