مسلم لیگ ق نے 27 ویں آئینی ترمیم کی حمایت کا اعلان کر دیا

مسلم لیگ ق نے حکومت کے ساتھ قومی مفاہمت کے لیے 27 ویں آئینی ترمیم کی حمایت اور تعاون کا اعلان کیا ہے۔ پارٹی کا اعلیٰ سطحی مشاورتی اجلاس سینئر نائب صدر چوہدری سالک حسین کی زیر صدارت ہوا، جس میں طارق حسن، ڈاکٹر امجد، مصطفیٰ ملک، فرخ خان اور دیگر رہنما بھی شریک تھے۔

اجلاس میں وزیراعظم سے پارلیمانی پارٹی کی ملاقات پر پارٹی کو اعتماد میں لیا گیا۔

واضح رہے کہ وفاقی کابینہ نے 27 ویں آئینی ترمیم کی منظوری دے دی ہے اور اب یہ ترمیم سینیٹ میں پیش کی جائے گی۔ وزیراعظم شہباز شریف نے آذربائیجان سے بذریعہ ویڈیو لنک کابینہ اجلاس کی صدارت کی، جس میں وزیر دفاع خواجہ آصف، مصدق ملک، رانا ثنا اللہ، ریاض حسین پیرزادہ، عون چوہدری، شزرہ منصب اور قیصر احمد شیخ شریک ہوئے۔ وزیر قانون اور اٹارنی جنرل منصور عثمان اعوان نے بھی اجلاس میں شرکت کی۔