افغان حکومت ٹی ٹی پی کیخلاف کارروائی کرے،پاکستان تعاون کو تیار،وزیراعظم

اسلام آباد: وزیراعظم شہباز شریف نے کہا ہے کہ اگر افغان حکومت کالعدم تحریک طالبان پاکستان (ٹی ٹی پی) اور دیگر دہشت گرد گروہوں کے خلاف مؤثر کارروائی کرے تو پاکستان مکمل تعاون کے لیے تیار ہے۔

بین الاپارلیمانی اسپیکرز کانفرنس کی افتتاحی تقریب سے خطاب میں وزیراعظم نے کہا کہ امن و استحکام ہی پائیدار ترقی کی بنیاد ہے، ترقی صرف اسی معاشرے میں ممکن ہے جہاں امن اور سلامتی ہو۔

انہوں نے کہا کہ پاکستان نے ہمیشہ امن دشمن کارروائیوں کا ڈٹ کر مقابلہ کیا، ہماری مسلح افواج نے دشمن کے عزائم ناکام بنائے اور وطن کے دفاع میں غیر معمولی عزم کا مظاہرہ کیا۔

وزیراعظم شہباز شریف کا کہنا تھا کہ رواں سال مئی میں مشرقی سرحد پر بلا اشتعال جارحیت ہوئی جبکہ گزشتہ ماہ افغان سرزمین سے پاکستانی چوکیوں پر حملے کیے گئے جن کا ٹھوس اور فیصلہ کن جواب دیا گیا۔

انہوں نے کہا کہ افغانستان کو سمجھنا ہوگا کہ ٹی ٹی پی کی حمایت سے امن قائم نہیں ہوسکتا، دہشت گردی کے خاتمے کے لیے علاقائی تعاون ناگزیر ہے۔

اسلام آباد میں جاری دو روزہ بین الاپارلیمانی کانفرنس میں آذربائیجان، ازبکستان، کینیا، فلسطین، مراکش، روانڈا، لائبیریا، بارباڈوس اور نیپال کے وفود شریک ہیں، جس کا مقصد عالمی امن، ترقی اور پارلیمانی روابط کو فروغ دینا ہے۔