27ویں آئینی ترمیم , چیف جسٹس یحیی آفریدی نے فل کورٹ اجلاس بلا لیا

اسلام آباد: چیف جسٹس یحییٰ آفریدی نے فل کورٹ اجلاس بلا لیا۔

نجی ٹی وی چینل کے مطابق ذرائع کاکہنا ہے کہ فل کورٹ اجلاس کل جمعہ نماز سے قبل ہوگا،فل کورٹ اجلاس میں 27 آئینی ترمیم پر بات ہوگی۔

یادرہے کہ سپریم کورٹ کے تین ججز نے فل کورٹ اجلاس کیلئے خط لکھا تھا۔خطو ط لکھنے والوں میں جسٹس منصور علی شاہ، جسٹس اطہر من اللہ اور جسٹس صلاح الدین پنہور شامل ہیں۔

جسٹس صلاح الدین پنہور کا چیف جسٹس یحییٰ آفریدی کو خط

27ویں آئینی ترمیم پر جسٹس صلاح الدین پنہور نے چیف جسٹس یحییٰ آفریدی کو خط لکھ دیاجس میں فل کورٹ بلانے کا مطالبہ کیا گیا ہے۔

نجی ٹی وی کے مطابق جسٹس صلاح الدین پنہور نے چیف جسٹس پاکستان کو خط میں کہا ہے کہ بطور احتجاج نہیں اپنا فرض سمجھتے ہوئے خط لکھ رہا ہوں، فل کورٹ میٹنگ بلا کر آئینی ترمیم کا شق وار جائزہ لیا جائے۔

خط کے متن میں کہا گیا ہے کہ لاء اینڈ جسٹس کمیشن اور عدالتی پالیسی ساز کمیٹی کو بھی مشاورت میں شامل کیا جائے، ستائیسویں ترمیم اختیارات کے توازن کو خراب کر سکتی ہے،آئین تقاضا کرتا ہے کہ سپریم کورٹ اس کا تحفظ کرے۔

جسٹس صلاح الدین پنہور نے کہا ہے کہ تاریخ آسانی کو نہیں بلکہ ہماری فیصلہ سازی کی ہمت کو یاد رکھے گی،عوامی اعتماد کو بچانے کیلئے فوری فل کورٹ اجلاس بلایا جائے۔

خط میں مزید کہا گیاہے کہ ہم ججز اس بات کو یقینی بنائیں کہ قانون کی حکمرانی صرف لفظوں میں نہیں،بطور جج آئین کے تحفظ اور دفاع کا حلف اٹھایا ہے،ایک وقت آتا ہے جب خاموشی احتیاط نہیں بلکہ دستبرداری ہوتی ہے،مجھے یقین ہے ایسا وقت ہم پر بھی آسکتا ہے،مجھے 27ویں ترمیم ان بنیادوں کو چھوتی نظر آرہی ہے جس پر عدلیہ کی عمارت قائم ہے۔

جسٹس صلاح الدین پنہور نے کہا ہے کہ اگر عدلیہ آزاد نہیں تو پھر قانون کی حکمرانی صرف ایک جملہ رہ جاتی ہے، 27ویں ترمیم ججز تقرری،برطرفی اور عدلیہ کی مالی و انتظامی خود مختاری پر اثر ڈال سکتی ہے۔