اردن کے بادشاہ آج سے دو روزہ سرکاری دورے پر پاکستان آئیں گے

اسلام آباد: ہاشمیہ مملکت اردن کے بادشاہ عبداللہ دوم ابن الحسین 15 سے 16 نومبر 2025ء تک پاکستان کا سرکاری دورہ کریں گے۔

ترجمان دفتر خارجہ طاہر حسین اندرابی کے مطابق یہ دورہ وزیراعظم شہباز شریف کی دعوت پر ہو رہا ہے اور پاکستان اور اردن کے دیرینہ برادرانہ تعلقات کا مظہر ہے۔ دورے کا مقصد دونوں ممالک کے سیاسی، معاشی اور ثقافتی شعبوں میں تعاون کو مزید مضبوط اور نئے دائرہ کار فراہم کرنا ہے۔

دورے کے دوران شاہ عبداللہ دوم صدر پاکستان اور وزیراعظم سے ملاقاتیں کریں گے، جن میں دو طرفہ تعلقات کے تمام پہلوؤں پر تبادلہ خیال ہوگا۔ ایوانِ صدر میں ایک خصوصی تقریب بھی منعقد کی جائے گی، جس میں شاہ عبداللہ دوم کو پاکستان کا اعلیٰ ترین سول ایوارڈ دیا جائے گا۔

دفتر خارجہ کے مطابق یہ دورہ پاکستان اور اردن کے تعلقات کو مزید مستحکم کرنے اور دو طرفہ تعاون کو وسیع کرنے میں اہم کردار ادا کرے گا۔