اردن کے شاہ عبداللہ دوم دو روزہ دورے پر اسلام آباد پہنچ گئے

 

 اردن کے شاہ عبداللّٰہ دوم پاکستان کے دو روزہ سرکاری دورے پر اسلام آباد پہنچ گئے، جہاں صدر مملکت آصف علی زرداری اور وزیراعظم شہباز شریف نے نور خان ایئر بیس پر ان کا پرتپاک استقبال کیا۔ اس موقع پر وفاقی وزراء، خاتونِ اوّل بی بی آصفہ بھٹو زرداری اور چیئرمین پیپلز پارٹی بلاول بھٹو زرداری بھی موجود تھے۔

پاکستانی فضائی حدود میں داخل ہوتے ہی پاک فضائیہ کے جنگی طیاروں نے شاہی جہاز کو خصوصی حفاظتی حصار فراہم کیا۔ بعد ازاں وزیرِ اعظم ہاؤس میں شاہ عبداللہ دوم کو روایتی گارڈ آف آنر بھی پیش کیا گیا۔

صدر آصف علی زرداری نے اپنے بیان میں کہا کہ شاہ عبداللّٰہ دوم کا دورہ پاکستان اور اردن کے دیرینہ تعلقات کو نئی اسٹریٹجک سمت دے گا۔ ان کے مطابق دونوں ممالک کے روابط تاریخی بھائی چارے، اعتماد اور مشترکہ اقدار پر قائم ہیں۔

دفترِ خارجہ نے بھی دورے کو انتہائی اہم قرار دیتے ہوئے کہا ہے کہ اس سے پاکستان اور اردن کے مابین اسٹریٹجک تعاون میں نمایاں اضافہ ہوگا۔ ترجمان نے بتایا کہ شاہ عبداللّٰہ دوم اپنی مصروفیات کے دوران صدر اور وزیر اعظم سے ملاقاتیں کریں گے جبکہ وفود کی سطح پر مذاکرات بھی ہوں گے۔

اعلامیے کے مطابق ایوان صدر میں شاہ عبداللّٰہ دوم کو پاکستان کا اعلیٰ ترین سول اعزاز بھی دیا جائے گا۔ دونوں ممالک کی قیادت اقتصادی تعاون، دفاعی شراکت داری اور علاقائی امور سمیت متعدد شعبوں میں تعاون بڑھانے پر گفتگو کرے گی۔

شاہ عبداللّٰہ دوم کا یہ دورہ دونوں برادر ملکوں کے درمیان تعلقات کو مزید گہرا کرنے اور باہمی تعاون کے نئے امکانات پیدا کرنے میں اہم سنگِ میل ثابت ہوگا۔