وزیراعظم شہبازشریف اور اردن کے بادشاہ عبداللہ دوم کی ملاقات

اسلام آباد: وزیراعظم شہبازشریف اور اردن کے بادشاہ عبداللہ دوم کے درمیان ملاقات ہوئی، جس دوران معاشی، تجارتی، سرمایہ کاری، صحت، تعلیم اور دفاعی شعبوں میں تعاون بڑھانے پر بات چیت ہوئی۔ دونوں رہنماؤں نے دوطرفہ تعلقات کو مزید گہرا کرنے اور سٹریٹجک و اقتصادی تعاون بڑھانے پر اتفاق کیا۔

ملاقات میں خطے اور عالمی فورمز پر مشترکہ تعاون، علاقائی سکیورٹی اور امن اقدامات پر بھی تفصیلی تبادلہ خیال کیا گیا۔ فلسطین کے معاملے پر دونوں ممالک نے یکساں مؤقف کا اعادہ کیا اور غزہ سے فلسطینیوں کی جبری بے دخلی کی سخت مخالفت کی۔ اس کے علاوہ آٹھ عرب اسلامی ممالک کے ساتھ قریبی کوآرڈینیشن بڑھانے پر بھی اتفاق کیا گیا۔

شاہ عبداللہ دوم نے غزہ کے معاملے پر اردن کی حمایت پر پاکستان کو سراہا، جبکہ وزیراعظم نے بادشاہ کو افغانستان اور بھارت سے متعلق صورتحال سے آگاہ کیا۔ ملاقات میں نائب وزیراعظم اسحاق ڈار، فیلڈ مارشل عاصم منیر اور وفاقی وزرا بھی موجود تھے۔

اس موقع پر پاکستان اور اردن کے درمیان میڈیا، ثقافت اور تعلیم کے شعبوں میں مفاہمتی یادداشتوں (MoU) پر دستخط کیے گئے، جبکہ وزیراعظم نے شاہ عبداللہ دوم کے اعزاز میں عشائیہ بھی دیا۔ واضح رہے کہ اردن کے بادشاہ کا پاکستان کا آخری دورہ سابق صدر ممنون حسین کی دعوت پر ہوا تھا، جس دوران دونوں ممالک نے دو مفاہمتی یادداشتوں پر دستخط کیے تھے۔